【本報訊】百年老店先施（244）忽然高調，花逾億元一口氣連開三間新舖，包括重返闊別12年的銅鑼灣。公司第三代傳人、先施副主席兼行政總裁馬景煊坦言，不少人對先施「舊式百貨」形象根深柢固，公司極需年輕化，希望重新包裝後年輕消費者可「畀個機會我哋」。
記者：鄭柏齡
租金高企，加上消費習慣變化，香港傳統華資百貨公司買少見少。不過，先施本月連開中環、旺角兩間新店，最遲11月底進駐銅鑼灣。馬景煊接受訪問時透露，三店總投資額約億元，其中昨日開幕、位於瓊華中心樓高五層的「先施MK」旗艦店，已斥資逾5,000萬元。
「梗係有期望，賺錢係緊要，但最希望改善埋先施印象。」馬景煊坦言，新一代覺得先施「老套」，連開三店是最好時機，藉新商標、新代言人、新產品等，為百年老店注入新鮮感，「希望年青人畀個機會我哋，睇吓先施嘅產品，價格公道，我哋都有好嘢。」
闊別12年 重返銅鑼灣
市傳先施在瓊華中心插旗，砌低潮牌「forever 21」搶得舖位，月租達600萬元。馬景煊解釋，「業主肯租畀我哋，可能係因為同聲同氣，唔會租幾年就離場掛。」他又透露，近年不斷尋找舖位，「以前去敲門，經紀一見先施就話『無位呀』！」但轉型消息傳出後，大批經紀主動叩門，「人哋覺得你真係有心改，咪搵番你囉。」
事實上，先施在中環、旺角連開新店，主要因區內舊舖租約期滿所致。相反，2001年後重返銅鑼灣開舖（波斯富街、利舞臺對面），對先施意味更深遠，馬景煊解畫「嗰邊以前冇乜人行，但𠵱家有莎莎、I.T.、UNIQLO開旗艦店，人流開始旺，應該都有得做。」
擴張的另一個原因，是馬景煊仍然看好香港百貨業，「過去幾年，先施每單銷售、利潤、VIP客都有增長，同對手比我哋唔算做得差」。他相信，港人消費模式已變更聰明，追求「抵買、有質素」，先施在歐美貨源採購上有優勢，「人哋名牌賣四千蚊，我哋同樣質地，但無咗個logo，只買一千蚊，甚至更平。」
現時先施客源中，大部份是30歲以上客人，馬景煊希望在新包裝下，把客路擴闊至約25歲的年輕家庭。他補充，旺角分店中，內地旅客佔比只有兩成，中環店更低至一成，「瓊華開咗後，應該會多咗大陸客，會問佢哋想買啲乜，再調整產品組合。」他希望在新包裝下，更多內地人認識先施，兩至三年內再尋找發展機會。
顧客心聲
【排七個鐘】
麥先生：「早於上午8時開始排隊，雖然排隊超過7小時才買到心頭好，仍覺得十分值得。」
【價錢好抵】
謝太太：「想買五層鑊或羽絨被，是次均一價很抵，買不到心儀貨品也會買其他。」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange