黃金周臨近，又係時間零售股尋寶。
服飾股普遍積弱，但眾所周知，其周期性好誇張，只要革新品牌、搵到樣食糊的產品，股價可以短時間升幾個開，例如2010年的I.T（999），以及近年的佐丹奴（709）。下一隻係邊個？魏力揀包浩斯（483，Bauhaus）。
坦白說，魏力未在Bauhaus買過銀包、牛仔褲，但近排行街或在公司，總見到好多女仔拎住Salad銀包、手袋，好奇一問之下，才知原來是包浩斯的自家品牌，款式夠青春、夠colourful，手袋介乎2,000至3,000銀，呢個價位嘅袋，市場真係唔多，但就食正大學生以至一般OL的需求，買得起，唔肉赤，感覺良好。
公司策略方面有改變，開始走「fast fashion」，由設計至起貨上架，會縮減至一至兩個月，雖然未去到H&M、Zara嗰個級數，但坦白說已經進步好大，可比以前出多兩三倍唔同的款式，轉攻女性市場，對刺激銷售幫助甚大，加埋六成以上的毛利率，未來一年盈利爆升，絕對不意外。
睇番盤數，去年上半年賺1,027萬銀，見晒底；下半年改革初見成效，純利飆升7倍至8,899萬銀；存貨大減26%，周轉日數降近五成，成條數健康番晒。用下半年條數計，今年好保守當增長15%，可賺2億元，預測PE得3.4倍，加埋6厘息，夠晒條件升1倍，去番上市高位。
魏力
http://www.facebook.com/2012jason
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24