九巴80大壽，為咗喺歷史博物館搞巴士歷史展覽，早前「生劏」咗部古董巴做道具，惹起巴士迷公憤。呢個展覽今起至11月11日開放畀市民參觀，展出嘅九巴文物，包括巴士司機制服、站名印布模等共77樣古董。財爺鬍鬚曾噚日都畀面出席預展，原來呢啲「中產」都鍾意睇巴士！但佢只同記者講聲hi，冇答問題就bye bye。
喺博物館外嘅廣場，同時會展出49年引進、俗稱「烏嘴狗」嘅丹拿A型雙層巴士，同埋76年引進嘅亞比安55型單層巴士。曾駕駛過烏嘴狗嘅退休司機蘇錦冠話，司機位就喺引擎旁邊，左腳熱到生唔出腳毛，退休10年後仍然「寸草不生」，變咗鴛鴦腳。兩部古董巴士只會展出至10月14日，想睇就要快手嘞。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange