貧富懸殊，本是社會問題，但在美國私立大學，因收費昂貴，家庭財富收入冇番咁上下嘅，幾難送仔女入一級私立名校。雖則話名校收生，只問成績，不及其餘，凡以高成績獲得取錄入學嘅，即使係來自貧窮家庭（即年收入低於21000美元），大學一定提供獎助學金，資助優秀學生入學，入學之後，到處遇到富家子弟炫耀性消費，這是另一個心理問題了。
最近著名經濟學家克魯明在佢嘅專欄中提及一篇「人人都談論嘅紐約時報文章」，究竟係乜東東？小B自紐約回港參加表哥婚禮，順便將嗰篇文章電郵俾左丁山睇一睇，標題係Class is Seen Dividing Harvard Business School，內裏報導新生入哈佛商學院，不少人就要「入社」（sections），入會費係三百至四百美元，作為參加社交應酬費用，另有一個極度秘密會社叫做Section X，社員全是大富豪子弟，會到冰島、莫斯科渡周末，冬季舞會收費每位200美元。哈佛MBA課程班上當然有不少學生來自清貧單親家庭，但整體情況就係富裕學生之中炫耀財富嘅學生不斷增加。
克魯明與小B嘅意見大致相同，就係：「貧富懸殊係美國社會一部份，過往富裕大學生有錢收埋靜靜使，但現時嘅富家子就鍾意將佢地環遊世界、滑雪嘅照片放上fb，任人睇，不顧他人反應。」
小B對此有佢嘅親身體會，佢來自中產家庭，入讀芝加哥大學之時，好彩得到一筆獎學金，先至可以無財政憂慮，佢遇上一位女同學，成為好友，好友放假時邀請小B到家裏探訪，一去到，小B暗地吃了一驚，因為女同學大宅背後有一個森林花園，女同學教佢騎馬踱步，遊園一周，小B心知大家嘅家庭財富相差太大，實際上係比較難以長期成為知心友嘅。呢個亦係左丁山當年不送子女入讀著名國際學校嘅理由，泰國A移居曼谷之前，欲以成本價轉讓國際學校debenture俾左丁山，諗咗一輪，不肯接受，叫佢以市價賣番出去，呢間學校之學生家長非富即貴，有不少係左丁山之中環波士級仔女同學，好驚佢地返嚟講：「同學Ｆ話全家去St. Moritz滑雪，問我地去唔去呀？」話去，荷包頂唔順，話唔去，兒子會失望，好容易產生心理障礙呀。