政府將於周六宣佈香港相對貧窮線,事前吹風貧窮人口將達130萬之多,公佈相對貧窮線後,香港將會進入全面資源爭奪戰,而且會波及移民政策及單程證審批,相信梁振英一路都冇估計在政治上嘅後果。
制訂相對貧窮線係梁振英民生施政重點,得到社福界支持,由林鄭控制之扶貧委員會執行,擬訂於住戶入息中位數五成。相對貧窮概念係一個重大改變,徹底推翻香港福利制度核心理念。林鄭月娥知道唔係嘢少,希望manage公眾期望,一早強調貧窮線係為咗監察作用,但並不與政府福利政策掛鈎,又早吹定風話公佈貧窮線後唔會即時推出扶貧措施,但政治現實係flood gate一打開,洪水將會洶湧而來,各式各樣福利訴求湧現,林鄭阻擋不了,更關鍵係政府內部冇改革共識,最後將變成各式各樣補貼、現金援助頂檔。
香港以往有冇貧窮線?表面冇,實際有,政務官人人都知,符合申領綜援收入就係貧窮線,呢條線係用絕對貧窮概念訂出,叫做Basic Needs Approach,一個家庭最基本生活所需,96年由肥彭拍板,冼德勤做福利署長時檢討過一次,大幅提高標準金額,但就沿用絕對貧窮去劃線,當時北京早已大聲疾呼福利快車會車毀人亡。相對貧窮線首先衝擊綜援制度,既然政府已確立以住戶入息中位數某個百分比去定義貧窮,福利界也會要求重訂綜援金額,令綜援戶收入水準達到中位入息某個百分比,短期而言,應top up用現金派錢方式畀到有中位入息五成為止。第二個衝擊來自最低工資標準,既然住戶入息中位數五成為之貧窮,政府好難再defend現時最低工資委員會所訂出每個鐘30蚊,雖然林鄭同最低工資委員會主席翟紹唐夾定計,翟表明最低工資不應與貧窮線掛鈎,算做堆定沙包,但要頂住工會、泛民、老左聯手,加上梁振英拯救民望工程,都好難守得住。第三個衝擊係N無人士正式有了一個攞福利嘅身份,政府難再以冇法界定作理由,拒絕援助。
食窮港人之說大有市場
林鄭天真幼稚地以為相對貧窮線冇實質政策含義,同福利勞工政策脫鈎,係自欺欺人。政府對改革福利體系根本冇共識亦冇規劃,只有見步行步。為了頂住綜援、最低工資、老人金等政策訴求,唯一方法係加大短期派錢力度,以關愛基金作派錢機制,然後再由福利開支吸納。而稅務負擔最重嘅香港中產睇住政府狂派,就一定會更加反對每日150個單程證新移民,不斷成為貧窮人口生力軍,「新移民食窮香港人」之說會大有市場。市民認為梁振英即使訂出相對貧窮線,訂下減貧指標冇用,因為用家庭團聚之名來港新移民不斷補充,減貧永遠無法達標。政府訂出相對貧窮線係進步,但內部根本對改革福利制度冇共識,難有作為,結果可能變成取回單程證審批權上,承受更大民意壓力。
加上北京喉舌撐單程證制度,香港反新移民浪潮會越搞越大。
添馬男
《亂噏24》現正逢一至五每日更新,今周嘉賓陳淑莊帶肥佬黎同蔡瀾背包旅行遊中歐,即刻收睇: http://bit.ly/appletalk24