上周五iPhone開售，中國消費者秉承他們對「黃金」的熱愛，瘋搶金色iPhone 5s。至於被外國媒體揶揄為「iPricey」的5c，反應亦唔差，至少有幾隻顏色都已經斷晒貨。在剛過去的周末，蘋果已賣出900萬部電話，較上次iPhone 5開售，多出400萬部，亦遠超過分析員原先估計的600萬部。部份原因，相信係因為今年首輪開售的國家，較以往為多，特別係多咗中國㖭。
蘋果的平膠phone沒有市場想像中咁cheap，分析員才驚覺自己幾咁一廂情願，幻想蘋果會以market為重，去搶攻未來數年智能電話增長最快的segment。點知蘋果頑固得猶如佢哋教主，仍以做出心目中的「great product」為首要考慮。如果靚mon、LTE、快晶片，沒有一樣係可以犧牲的，最後決定只換個膠殼，咁可以平得幾多？
Tim Cook上周接受《彭博》雜誌訪問，講到明蘋果「唔會做垃圾生意」（We're not in the junk business），幾咁寸。有朋友就提醒海迪，多年前平價laptop盛行時，蘋果卻走去出部成萬蚊的Macbook Air，當時Steve Jobs亦曾說過類似的話。但沒多久當Air量產及技術成熟後，售價瞬即平咗一大截，收窄與對手的差距。這個故事會否在5c中重演，有待時間驗證。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange