胡潤富豪榜認真多類別，噚日公佈「2013胡潤IT及娛樂富豪榜」，結果由股王騰訊（700）主席馬化騰，以560億元（人民幣．下同）榮登IT富豪榜榜首。
馬化騰嘅身家仲係4年來首次超過百度嘅李彥宏，而身家460億嘅李彥宏跌咗落第二位，第三位係smartphone概念股歌爾聲學大股東姜濱家族，第四就係傳聞同馬化騰面和心不和嘅網易主席丁磊，至於近期人氣最勁、搞上市搞到一頭煙嘅阿里巴巴創辦人馬雲，就以230億身家排第五。
呢類富豪榜通常計埋上市公司市值，騰訊噚日嘅市值係7,605億港元，市傳阿里上到市嘅話，估值最高有7,800億港元，兩間公司睇嚟叮噹馬頭。難怪上個禮拜胡潤榜發言人預言，5年後嘅「胡潤百富榜」首富唔係馬雲就係馬化騰咁話。
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24