特區政府搞扶貧，要為社會訂立一條貧窮線，傳聞即將發表諮詢報告，會由政務司司長林鄭月娥親自掛帥，極力推介，勞工福利局局長張建宗做副手，周圍游說議員支持。
扶貧大旗舉起，冇乜人夠膽反對，社福界人士肯定叫好，可能仲會批評政府扶貧力度不夠，要派糖多啲㖭。最乞人憎嘅當然就係讀經濟學之人，左丁山係其中之一，呢類人會指出扶貧是治標不治本，古老話有一句，長貧難顧，經濟學者治理貧窮，就會注重經濟增長及提供個人上進機會，鼓勵憑個人讀書努力上進，脫離貧窮。
貧窮，特別係貧富懸殊，所謂1% vs 99%嘅問題，大部份源於經濟結構及政府經濟政策，世界上實行資本主義嘅國家，或多或少，都有貧富懸殊問題，昔日毛澤東中國，全民皆窮，只有權力懸殊，並無貧富懸殊，今天中國特色社會主義就既有權力懸殊，亦有貧富懸殊，少數人士憑貪污及特權，可以在短時間內取得大量財富，財富累積之差距，比香港更甚。
最近美國總統奧巴馬頭頭碰着黑，諸事不順，在雷曼破產五周年之時，佢接受電視台訪問，慨嘆過去五年（由2008年-2012年），10%人士取得了95%的入息增長，中產及基層只得到極少好處，事實上，自2000年起，美國嘅家庭收入中位數（median household income）下跌咗4000美元至2012年嘅$51097美元，2012年嘅入息比2007年低出咗8.3%，即係話過去幾年美國經濟嘅不景氣及隨後之所謂復蘇，對絕大部份美國人全無好處。美國人口普查局嘅數字指出，有四千六百五十萬人生活於貧窮景况，佔人口15.1%（貧窮之定義，一家四口年入23492美元或以下，個人收入11,720美元或以下）。以前美國有錢人在經濟膨脹時，財富膨脹得更快，不景氣時，財富萎縮得更多，但近五年來，有錢人輸得少，賺得多，原因係股市大漲，譬如自2009年股市低潮後，美國股市上漲超過2倍，係得到聯儲局量化寬鬆印銀紙嘅大大幫忙吖嗎，長期低息環境一定推高財務資產價格（包括樓價），有恒產人士之得益甚大，打工仔冇樓冇股票嘅，只靠份人工肯定大大吃虧，奧巴馬感嘆美國有錢人太有錢，唔通佢唔知道，美國聯儲局正是元凶？香港一定要緊跟美國，貧富趨勢相同，任憑林鄭點樣打得都冇用。