無綫節目《星夢傳奇》前晚八號風球下喺將軍澳電視廣播城閉門錄影最後一集，順利誕生最後五強，結果「鬼妹」陳明恩以88分第一名晉級（前晚不設現場觀眾，只計評判分數），其他依次為鄭世豪、羅鈞滿、鄭俊弘同姚兵，葉暐同新挑戰者陳倩揚就俾人叮走咗。決賽將分兩日進行，先喺下月12日進行首場淘汰賽，其中一個會被out，餘下四強直入13日嘅直播決賽，由全民一人一票選出冠軍。
鄭俊弘梗頸四
講番前晚嘅錄影，鄭俊弘唔知係咪因為師傅巫啟賢喺度，表現有啲失準，只排第四位！鄭俊弘話因為呢集好關鍵，怕入唔到圍先咁緊張：「唔關師傅事，𠵱家入到決賽都鬆一口氣，要開始揀歌做準備。」反而咽喉發炎嘅羅鈞滿病住唱都保持水準，而挑戰者陳倩揚唱鄭秀文嘅《默契》，但天后都幫唔到佢入圍囉！
另一挑戰者係唱功了得嘅「卡拉之星」鄭世豪，佢之前因為冇得參賽而寫網誌話個節目唔太公平，直到最後一集終於有機會踩台，仲入埋最後五強㖭，世豪噚日喺電話度話好開心，亦承認之前有話過個節目：「個幾星期前通知做最後一集，失而復得嘅感覺相當好，有得上星夢舞台已心滿意足，冇乜嘢寄望，唔諗咁多，盡力唱好歌，答謝支持者。」
版主：陳基征
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24