天兔為股市帶來半日假期，成交顯得特別暢旺，三粒鐘有440億銀交投，絕對拍得住淡市嘅全日成交，單從呢個角度出發，經紀們反對延長交易時段，實在不無道理。
美國財政懸崖再被擺上枱，成為美股上周五急插原因之一，另一個利淡因素，就係有儲局官員放風，話10月應該要退市。不過，10月儲局會議並冇記者會跟尾，呢個影響環球股匯債市場嘅決定，會唔會單向地落實，實在好值得懷疑。話唔定伯南克會去到任期最後一刻、即出年1月先會宣佈退市，將退市對市場帶來嘅影響，交畀接班人應付。
大膽假設美國今年唔會收水，高息股隨時又會炒番轉，服裝股佐丹奴（709）出名派息慷慨兼穩定，過去兩年全年分別派息38仙及40仙，假設今年全年派息42仙（上半年已派16仙），現價計息率達5.8厘，有一定吸引力。佐丹奴上半年賺3.4億銀，按年倒退3.4%，如撇除2012年特殊收益，核心盈利增長一成。雖然中港銷售雙雙倒退，但新開發嘅中東業務，成功抵銷相關影響，盈利有望保持穩步增長。佐丹奴現價市盈率13倍，實為穩陣收息之選，在chok市更有極強防守力，一旦翻叮高息股，佐丹奴肯定有份。
唐牛
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24