今日孫柏文叫大家一注獨贏數碼通（315）。佢兩星期前出咗份有人覺得唔妥嘅業績，因此，雖然呢一年股價已不斷下滑，不過業績後再插超過10%。
數碼通啱啱嗰份全年業績，營業額120億元，比三年前升三倍，按年升兩成；盈利8.4億元，比三年前升2.9倍，按年就慘跌17%；數碼通一路都有本地財團子公司「賺幾多、派息派幾多」嘅作風，但呢次留兩成盈利唔派，就有投資者拋售。
撤無限數據 毛利看俏
數碼通毛利大減，因為雖然越來越多客要無線上網，不過有個別客戶用嘅數據量幾何咁升。點解？因為睇片囉。用量最大嘅火車頭係TVB嘅MyTV；現客用多咗，但就一路冇加價。不過上個禮拜，數碼通卒之做嘢！
數碼通上周宣佈再冇任用，5 GB數據為上限，過咗要每GB畀200蚊。咁1 GB即係幾多？用手機睇片，可睇16小時。每月用手機網絡睇兩套30集電視劇嘅用戶，就會過。𠵱家就係想迫佔八成用量嘅嗰兩成用戶，唔改上網習慣就加你價。而如果總體數據用量增幅可以㩒住，起發射站嘅投資成本就可鬆一鬆，毛利進一步升。120億元營業額，毛利升半成，盈利已升八成。
佢哋減派息比率係因政府可能會於2016年收番頻譜賣，所以要儲現金。低級政府官員話想賣畀中移動（941），但中港矛盾係政治第一焦點，梁特首照計唔想自殺。一旦原本四間電訊商繼續有牌，數碼通派息比率就會增加，股價可由現價10.5元，一飆飆去13.2元。
如果用戶唔嘈數據用量封頂、加價，投資步伐可唞氣，啲大行分析員今年尾將相繼調高對數碼通嘅預測，所以我先定16元為12個月目標價。
孫柏文
獨立股評人
http://facebook.com/shuen
本欄逢周二刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange