恒隆地產（101）舊年底爆出老臣子劈炮疑雲，劈炮主角之一、前執董高伯遒終於有新動向，將於下月轉投金融界名人吳鴻生（Robert）旗下內房股南華置地（8155）做執董兼副主席，雖然由藍籌跌落創業板，公司市值由1,200億元變成20億元，但高伯遒嘅年薪多過以前，抵番晒啦。
南華份糧多過恒隆
高伯遒同姚子賢兩位恒隆老臣子，舊年12月前後腳劈炮，原因都係「投放更多時間從事其私人事宜」呢類行貨，當時市場盛傳兩人離開，係因為公事同公司鬧得不愉快，最終又不了了之。
事隔大半年，嗰啲要投放更多時間嘅私事可能搞掂咗，高伯遒終於出山，重投地產老本行，公司就由藍籌變成成創業板公司。
南華置地出手相當闊綽，包埋保證花紅，高伯遒年薪有1,580萬元，比佢舊年喺恒隆地產份糧，多6.7%。南華置地舊年僱員福利開支（包括董事薪酬）都係3,574萬元咋，肯畀千六萬高伯遒，仲唔係闊綽！
咪睇南華置地係創業板股仔，老闆Robert嘅來頭唔細，喺證券界好出名，除咗南華置地之外，仲有南華金融（619）、南華中國（413）同埋南華集團（265）幾間上市公司，除咗炒股叻，佢早年亦保薦唔少中小企上市。
聽聞，Robert重金禮聘高伯遒，係想喺內地大展拳腳，高伯遒喺恒隆主要負責內地建築工程，咁啱南華置地近年喺內地買落唔少地皮，重點項目瀋陽中環廣場剛開工，恒隆喺瀋陽嘅新商場，高伯遒亦出過唔少力，雙方一拍即合。
李華華
mailto:[email protected]
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24