里昂一年一度在港舉行嘅投資者論壇，噚日早上喺八號波高高掛之時，於灣仔君悅開波，風雨不改。聽聞好多里昂客戶同講者都係住喺君悅或者金鐘嘅酒店，打風都影響唔到佢哋。
里昂方面話，今年有1,600名機構投資者、600名高級行政人員出席，數目多過舊年。華華目測地下大廳情況，同舊年一樣都係逼逼哋，出席人數確實冇受「天兔」影響。
雖然中信証券（6030）上月正式完成收購里昂，不過噚日依然由里昂董事長施立宏主持第一場記者會，一開始係同大家玩懷舊，播番過去幾十年亞洲發展嘅片段。
碧咸聽日上台演講
被問到佢打算幾時功成身退，佢就話𠵱家嘅情況好有趣，想睇多啲，冇諗過唔做，又話公司喺亞洲有更多發展，包括企業融資同研究部方面都有好多機遇，點捨得走咁話。
里昂論壇嘅重頭戲，當然係「萬人迷」球星碧咸聽日上台擔任演講嘉賓，周四就有人氣澳洲歌星Kylie Minogue表演，可惜兩場都係「客仔only」。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange