香港體壇近排喜事多籮籮，繼鄭麗莎上周五喺關島結婚，香港7欖代表郭嘉進，上周六都同拍拖10年嘅女友Coco拉埋天窗。心繫7欖嘅嘉進，為咗亞洲系列賽，仲特別延遲度蜜月。至於問佢幾時生B，佢就鬼馬咁話：「會盡快，等我好消息！」莫非佢暗示啲乜?
唔好睇27歲嘅嘉進高頭大馬，又係消防員，其實佢對老婆好鬼細心，亦聽晒老婆話；好似揀大婚日子就完全跟Coco嘅意思，榮升郭太嘅Coco話：「揀2013年9月結婚，係因為今年剛好拍拖10周年，而中秋節係我哋一齊過嘅第一個節日。」
港隊泰國站奪亞軍
難得Coco體諒老公仔對欖球痴心一片，兩人決定將蜜月延至12月，嘉進賣口乖話：「𠵱家結咗婚，乜都要以老婆同屋企行先，要為佢哋打算多啲；欖球方面，我好想幫港隊打亞洲系列賽，為衞冕『亞洲1哥』出一分力，所以蜜月要打完系列賽先去（系列賽至11月初）。」
婚後立刻歸隊嘅嘉進，下月中就要應付印度站嘅亞洲7欖系列賽。當然，佢亦好關心噚日喺泰國打第2站亞洲系列賽嘅港隊隊友，而球隊亦不負「進」望，殺入決賽對日本，可惜最後輸12:17屈居亞軍。
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇：
http://bit.ly/appletalk24