強颱風天兔未殺到，全港已史無前例嚴陣以待，貼玻璃嘅膠紙一卷難求。正所謂非常時期用非常方法，有人貼貼吓，索性一反傳統，唔係貼「大交叉」，有住宅同茶餐廳喺個窗口，貼咗「天兔」兩個字，唔通諗住個風會認得自己個名，可以保平安？有網民建議，不如貼「平反六四」啦。有專家就提醒，無論點樣亂咁貼，都要記住貼窗角，否則會冇保護玻璃嘅效果。
網民建議貼平反六四
噚日下午，全城除咗去街市掃蔬菜外，仲要掃膠紙貼好玻璃門窗。可能次次都係貼大交叉太悶啦，有茶餐廳就索性貼咗「天兔」兩個字出嚟，有人就一隻窗貼個「囧」字，另一隻窗貼個「国」字，如果23條立咗法，可能已俾人拉咗啦。大學兼任講師曹文傑（小曹）就將個窗貼成紅邊格仔，貼完之後都不禁反問係咪誇張咗啲。其他創意之作有膠紙兔同埋井字過三關等。有網民就提出，不如貼「平反六四」啦；有人就建議貼個「梁」字，再喺上面貼交叉。
理工大學機械工程學系工程師盧國強就話，傳統嘅「打交叉」貼法，應由玻璃窗角連到另一邊窗角，以防玻璃碎裂時碎片四散。但係無論係「天兔」或者「囧国」，都只係喺中間部位加強咗防風效果，未有連接窗角，如俾強風吹到正，就較易崩落。翻查網上資料，好多專家都話，貼「米」字係最穩陣。
李八方
MAILTO:[email protected]
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24