外國月光係咪特別圓？呢樣嘢可以問吓民主黨李永達嘞，事關喺唔少港人留港過中秋賞月之際，高達就同太太阿Tree陳樹英去咗伊朗自由行。高達話呀，中秋節當日孖住老婆大人阿Tree賞月，過咗個難忘嘅中秋節。伊朗嘅女人要戴面紗㗎，阿Tree亦入鄉隨俗，戴住頭紗周圍遊，但高達話伊朗其實開放咗好多，見到好多少女着得好colorful，化晒妝靚一靚咁先出街。
與此同時，佢哋嘅黨友張文光，咁啱亦遠離香港過中秋，冇做議員後周圍遊嘅佢，今次去咗個短途trip，揀咗台東，點知卻撞正打風，冇得坐船去綠島，惟有喺知本浸溫泉，橫風橫雨都浸極唔走補數。
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24