噚日雖然打風，不過鍾嘉欣、田蕊妮、蕭正楠同李亞男等仍然去樂富宣傳今晚首播嘅無綫新劇《巨輪》，仲即場手製花生糖派畀觀眾。喺眾多藝員中，嘉欣BB零零舍舍着到勁娘，一身九十年代服飾，黑色喱士衫配高腰褲，訪問時嘉欣BB都忍唔住喪笑：「今日得我一個着九十年代衫！我漏夜搵咗兩、三個鐘，點知後尾唔使着，不過（劇組）冇通知，好瘀囉！」佢希望個風可以令觀眾留喺屋企，帶挈新劇有好收視。講到蔡少芬喺內地商演幾乎俾人綁架，嘉欣BB話無論去邊，特別係內地，都要加強保護意識，佢都試過喺內地拍戲遇到收陀地，佢明白嗰種驚！
蕭正楠再做代言人
至於蕭正楠今次唔止擔正做男主角，仲因而做埋贊助商嘅代言人，不過佢好尷尬咁話：「對上一次做廣告代言人係『o雪o雪o雪』，已經有八、九年喇！」當年蕭正楠幫金龍船拍個蛋糕廣告，不停o雪o雪o雪，俾人笑足一世，𠵱家都算守得雲開啦！
另外，田蕊妮星期六生日，佢話因為屋企養咗貓咪，所以會約啲朋友返屋企慶祝。講到佢老公杜汶澤減肥成功，仲操到好弗，問佢驚唔驚招惹狂蜂浪蝶？阿田話：「係咪佢驚我先呀！」
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇：
http://bit.ly/appletalk24