在樂壇銷聲匿迹15年的彭家麗，相信貪新忘舊的香港人，沒多少個記得她的名字，近日卻因跟走音主席合唱《從不喜歡孤單一個》，彭家麗因表現專業獲網友激讚，她感嘆說：「冇諗過一晚之間喚番醒香港人，有個彭家麗喺度。」當年黯然離開樂壇的她，04年被扑頭幾乎一命鳴呼後，現珍惜每次唱歌機會，希望可以再出唱片及圓紅館夢。
撰文：余燕儀
彭家麗和蘇永康94年合唱《從不喜歡孤單一個》，橫掃樂壇頒獎禮的合唱歌曲獎，惟她於98年推出最後一張個人唱片《尋找》後，就悄然離開樂壇，改為做老師教人唱歌，消失了15年的彭家麗，上月與「紅日娛樂」主席朱壽仁在灣仔修頓球場合唱《從不喜歡孤單一個》，朱主席走音甩beat片段近日在網上瘋傳淪為笑柄，相反網友就激讚彭家麗處變不驚唱出水準。
現年44歲的彭家麗再被善忘的港人記起，還讚她忍笑功夫一絕，她說：「我冇刻意去忍，教學生咁多年聽過有啲更差，站喺歌唱老師角度，我唔會笑任何學生，希望唔好嚇怕人唔敢同我合唱。其實自己好開心睇到網友讚我專業，出街好多人認得我係彭家麗，冇諗過一晚之間喚番醒香港人，有個彭家麗喺度。」
匿家哭泣
離開樂壇多年後，再有人讚自己唱歌好，激起她的唱歌夢，彭家麗坦言：「我有諗過復出，希望等到欣賞我嘅伯樂，其實之前有同唱片公司初步傾過，但未落實。」當年彭家麗認為自己不適合娛樂圈，跟唱片公司解約改行教唱歌，她說：「未讀完書已經簽約，唔太適應環境，一直都有壓力，覺得努力同成果唔成正比，有啲心灰意冷，試過唱完歌返屋企喊，聽到𠵱家藝人話有情緒病，如果我再唱落去，可能都會有情緒病，咁啱有朋友開學校教唱歌，我走嘅時候就係呢首歌攞獎，覺得對自己有交代，所以決定離開。」
扑頭險死
04年彭家麗在佐敦上海街被人扑頭打劫，令她改變人生觀，她說：「後腦縫咗五針，𠵱家手腳協調會差啲，反應冇咁快，當時要自己打波、學肚皮舞練身體機能，又學韓文逼自己去記，一步一步練習番，呢幾年享受人生過有意義嘅生命。」回憶生死一刻，彭家麗感恩現仍可唱歌：「聽到醫生話頭骨裂咗有生命危險，嗰刻諗自己仲有乜嘢未做完？我未開演唱會，未結婚生仔，我都希望完成心願，有時會諗，紅館舊咗，千祈唔好拆住呀，拆咗冇機會開騷。」
場地提供：中國紅（E-Max）
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇：
http://bit.ly/appletalk24