各位享受緊假期兼叫緊糊再放多一日假嘅打工仔你哋好，中秋前後有乜話題最令人厭惡呢？可能係「食晒啲月餅未呀？」，亦可能係無端端同你講公事吧！Sorry，我就係想乞你憎，同你傾吓公事，跟我入老細房先講。
「阿丙，好少同你傾心事，即係想問下你，日日做到冇停手，其實一年流流最happy係做乜？」老闆難得溫柔，一定有陰謀。
「仲使問嘅，最興奮嘅就梗係去旅行啦，今年我plan咗聖誕去英國，現場睇我愛隊嘅英超大戰呀！」打工仔響老細面前，唔知點解總會有點過份天真。
「原來係現場睇英超，又係幾吸引嘅，阿丙，為咗呢個夢想，你……可以去到幾盡吖？」老闆突然用新潮口脗去講老套嘢。
「吓，可以幾盡？我諗可以盡到拋妻棄子……幾日咁多啦，甚至犧牲我換新電話嘅budget都得嘅，因為我嘅夢想，就係踏足英超賽場！」阿丙講到呢度，眼中流露咗廿年冇見嘅青春火花。
「嗯，都幾盡吖，好，我決定畀個夢想成真嘅機會你，只係減些少人工啫，你就可以現場睇足成季嘅英超賽事，制唔制？5秒內答我！」老闆突然單刀直入。
「乜有啲咁筍嘅嘢呀老細，唔好倒數住，話畀我知，究竟係減幾多人工先！」阿丙口水流之際問咗關鍵問題。
「唔多，減你60%啫，抵啦啩！」
「乜話！」阿丙笑唔出，仲差啲喊。
真人真事發生喺韋斯咸嘅一位現場評述員尼古拉斯身上，呢位50歲嘅前輩本身係BBC兼職記者，由98年開始負責喺韋斯咸主場搞氣氛，出名幽默，而呢份喺場邊最佳位置睇波嘅工作，亦係佢嘅dream job。做足15年本來相安無事，點不知今季球會突然同佢講，由於財政問題（可能係安祖卡路爾人工太高），要減佢薪6成，由以往一場500鎊減到得200鎊，阿尼古拉斯諗咗好耐，本來仲想死忍，但最後考慮到家中患病嘅太太需要照顧，決定忍痛辭職，引來球迷議論紛紛。畀着係你，你會點揀？應承老闆，定殺咗個老闆？
KEYMAN
now TV主持
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange