昨日SONY三機發功搶盡目光，原來「綠軍」Xbox亦冇完全投降，搵嚟《Titanfall》中的機械巨人助陣，首次試玩引嚟長長人龍。相對其他遊戲廠就較失色，首曝新作極少，反而手機平台遊戲在TGS地位越見提高，作品越見吸引，成為Game界新勢力！
記者、攝影：韓繼聰
《Titanfall》爽快機械人大戰
今年Xbox攤位，遊戲主機Xbox360及XboxOne各佔地一半，人流當然明顯傾向新機，但《Forza5》、《Killer Instinct》早已見過，數吸引力最大，當然係首次有得試玩的攤位主角《Titanfall》，高峯期都要排成粒鐘先有得試玩。玩家除第一身揸槍作戰外，最大特色是要操控機械人大戰，動作反應迅速爽快，無論近身肉搏，或遠炮攻擊都相當刺激，戰鬥場面充滿迫力，絕對是期待作！
手機遊戲搶灘
近幾年手機遊戲在TGS的地位逐漸提升，日系大廠GREE連續兩年拍住SONY咁大；就連傳統大廠CAPCOM，家用作品只有《戰國 BASARA 4》力撐，感覺更吸引的是手機版《芒亨Smart》，試用手指屠龍感覺亦不俗，操作簡單，但各項設定仍不失原著風味。
在香港引起熱話的《Puzzle & Dragons》更由手機殺上3DS，勁多人試玩！玩法大致相同，但卻加強故事性，唔使畀錢抽嘢外，更可連線換寵，現場試玩完，更有實體試版遊戲送，務求要你中毒！
大作冇影 大頭高達搶眼
講番家用大作，《人中之龍：維新》攤位雖大，但只見龍馬像及和服女子現身，試玩欠奉；另一期待大作《Metal Gear V》更係完全冇影。要數吸引眼球的，相信只有擺出大型高達頭的《真．高達無雙》，高達迷在RX-78贒實下，打得特別起勁。
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24