【隔牆對論】
梁振英政府推出長遠房屋策略諮詢文件，計劃將建屋目標定為每年4.7萬個單位，較董建華時代的8.5萬大縮水。長策會成員劉炳章指，公屋輪候冊有「發水」成份，「有啲年輕人18歲就去排隊，輪到佢時可能都唔合資格啦！」他又指香港人口增長比較細，10年約增加56萬人，「實際需要19萬個單位就夠」。影子長策會成員陳紹銘指出，未來10年只得約28萬個新建公屋，但「𠵱家輪候公屋超過23萬戶」。他認為10年後，劏房問題依然未能解決，公屋輪候人數會再創新高，「30萬、35萬係咁上」。
記者︰譚靜雯 姚國雄
記：《蘋果》記者
陳：民間智庫「影子長策會」成員、前線社工陳紹銘
於1987年，政府提出每年興建7萬個公私營單位，公屋、居屋佔4萬；1998年，政府提出每年興建8.5萬個公私營單位，公屋、居屋佔5萬；2013年，長策會提出，每年只興建4.7萬公私營單位，公屋和居屋佔2.8萬。
記： 諮詢文件提出未來10年，公私營房屋總供應為47萬個，社會質疑數量是低估住屋需求，你如何解讀這數字？
陳： 一聽到47萬呢個數，印象比上次房屋策略（董建華年代）少好多，嗰時講緊一年8萬，𠵱家係一年4.7萬個。政府數字唔透明，因為呢47萬，最大部份係計算「新增住戶」數目，佔咗29.4萬，但資料猶如黑盒，究竟住喺呢29.4萬單位嘅人，係有錢？係窮？住屋需要係點呢？全部冇提到。
記： 公屋、居屋，由回歸前每年規劃興建4萬個，跌至如今規劃每年2.8萬，公屋不足夠情況有多嚴重？
陳： 𠵱家輪候公屋超過23萬戶。如果未來10年，興建公屋單位係23萬，居屋5萬，呢批單位只係應付到𠵱家條人龍，但新申請呢？過去一年新申請上公屋住戶有6萬個，所以未來建屋量根本唔能夠處理𠵱家嘅需要。所以，公屋輪候冊呢條龍只會越來越長，輪候時間一定會超過三年。
諮詢文件推算每年興建4.7萬的單位，並無計算現時已有適切居所的住戶，亦不包括細屋搬大屋、投資買樓等需求。數字只是計算住戶的淨增長（如結婚、住戶分戶、新移民）、受重建影響及居住環境欠佳的住戶。
記：此計算方法有甚麼盲點？
陳： 盲點係佢計算嘅因素，幾乎全部都係「將來式」，例如29.4萬嘅新增住戶係將來式，受重建影響嘅住戶係將來式，唯獨係佢居住環境欠佳，係現在式。𠵱家唔少市民住得好逼、樓價貴、租金貴，其實諮詢文件冇處理到，即係話，我當政府未來10年乜嘢樓都唔起，但係住得好差嘅人，諮詢文件係冇照顧到，因為文件只集中處理未來10年嘅需要（淨增長）。
記： 諮詢文件表明不建議重推置業貸款、租金援助等措施，擔心會刺激市場需求，推高租金，你是否同意？
陳： 我都同意唔推置業貸款，因為會刺激需求，但係租金援助就唔同，因為租金津貼某程度上係一個違約補償，政府承諾排隊上公屋嘅市民三年上樓，政府做唔到承諾，應該畀津貼市民，租番間好啲嘅屋。我明白咁做會令租金有上升壓力，但唔係咁真係唔知點處理。
記： 對正在排隊上公屋的市民來說，諮詢文件究竟是一個希望，還是令上樓希望幻滅？外界常說梁振英經濟傾左，由他掌政不是基層上樓的希望嗎？
陳： 基層市民識計數嘅話，直情係絕望，尤其𠵱家公佈嘅公屋興建量，同梁振英參選時好大落差，佢未參選時，講緊每年興建3.5萬間公屋，𠵱家得番2萬幾。
佢參選時主打房屋同埋貧窮問題，畀基層市民好多期望，開咗好多空頭支票出嚟，𠵱家完全做唔到。我想叫梁振英落去棺材房解釋吓，點同啲單身人士講，叫佢喺棺材房等10年先上到樓，我想佢解釋點解唔攞粉嶺高爾夫球場塊地出嚟起樓，反映佢係決心、力度都唔夠，但佢總比曾蔭權好。
記： 陳茂波日前提出社會可討論發展郊野公園，你認為可行嗎？
陳： 呢個唔係未來10年值得討論或者用得着嘅方案，好多評論已講過唔可行，郊野公園好多地都唔係平地，即使係平地生態價值都好高，要發展都過唔到環評。民間其實都盡力幫梁振英搵地。例如超過2,000公頃嘅解放軍軍營，政府求其收番一個軍營，都有100公頃地；丁屋地都有1,000公傾地，但政府冇研究、冇解釋點解唔用呢啲地。佢講過話自己個個利益階層都敢「掂」，點解唔敢掂丁屋？
記： 如果一切按諮詢文件落實，10年後等上公屋、年輕的無殼蝸牛會面對甚麼境況？
陳： 10年後，我相信我哋仍然講緊劏房點規管，排緊隊上公屋嗰班人，當然有啲上咗樓，但係條隊會越來越長，公屋輪候人數會屢創新高，30萬、35萬係咁上。年輕人，直情係冇希望啦，因為成份文件根本冇提過年輕人可以點樣置業。呢份報告係好驚未來冧市，好驚做咗罪人。未來10年，政府話起28萬公屋、居屋，我當你居屋5萬，其實每年只有5,000個，應付唔到年輕人嘅需要。10年後？其實問題依舊。
mailto:[email protected]
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24