曼城領隊唔易做，因為陣容嘅牌面可以話冠絕英超，所以如果成績一唔掂，壓力就會落咗喺領隊身上。曼城開季成績唔係太好，唔少人討論比歷連尼有冇能力教曼城，小弟會用兩方面去分析，先係戰術安排。
當年比歷連尼帶領維拉利爾歐聯4強，舊年佢就帶馬拉加入8強，可見佢好識用戰術去彌補球員質素。曼城今季嘅比賽，睇得見比帥將球隊嘅節奏加快，首場踢出水銀瀉地嘅攻勢，但喺之後幾場，曼城就出現問題。當對手死守時，曼城便失去進攻的空間，變成老鼠拉龜，幸運的話可以僅僅熟，例如搞掂侯城，如果唔好彩就好似上輪悶和史篤城。要攞英超冠軍，對弱隊贏波比贏強隊更重要，但比帥麾下嘅曼城好似唔太識點去應付弱隊嘅死守同反擊。
呢方面可能同比歷連尼嘅經驗有關，一來佢喺歐洲只係教過一隊班霸，就係皇家馬德里，同埋只係教過1年；仲有佢教開西甲，而西甲弱隊嘅防守冇英超嗰啲咁強硬同體力化，所以𠵱家就有問題，睇吓佢解唔解決到？
教曼城，需要領隊有駕馭球星嘅能力，咁講都唔啱，應該係一次過駕馭好多球星嘅能力先啱；睇番比帥嘅履歷，係得教皇馬嗰年叫做管理過成班球星，所以呢方面經驗唔多。占士米拿、魯迪維爾同拿斯尼唔太受比歷連尼重用，比帥遲啲需要安撫佢哋嘅情緒，保持球隊和諧。文：咖喱
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，
即刻收睇： http://bit.ly/appletalk24