金剛同陳蕊蕊拍拖已經係公開嘅秘密，前晚金剛喺將軍澳電視廣播城錄影《超級無敵獎門人終極篇》，陳蕊蕊做嘉賓，梗係俾記者要求合照，男女主角表現大方，記者叫佢哋黐埋啲親密啲，金剛搞笑話：「我個波已經頂到佢手臂喎。」
叫志偉做阿爸
玩「超級無敵翻翻翻」要坐上凳反起，蕊蕊着短褲實走光，金剛睇到即同志偉咬耳仔，跟住志偉就話蕊蕊唔使玩，金剛擺明保護女友，唔想佢走光蝕底，真係錫蕊蕊錫到出晒面。成晚金剛都好風騷搞笑：「我細個似郭富城，五官同髮型似。」仲即跳城城啲舞，志偉忍唔住話：「頂你個肺。」金剛又拉蕊蕊行埋志偉度：「叫阿爸呀。」蕊蕊好尷尬：「晏啲先。」食辣辣壽司時金剛輸咗，志偉罰佢同蕊蕊一齊食蛋壽司，金剛好溫柔叫女友：「你食蛋先。」志偉即講三級嘢：「你叫蕊蕊食你隻蛋先。」
猝死大老倌林錦堂嘅遺孀想志偉扶靈，佢話：「一定去，細個佢（林錦堂）成日嚟我屋企玩，父母都當佢契仔。」不過今年係志偉60歲大壽，佢話朋友最重要，自己唔迷信唔計較。講到志偉搞公司簽咗張衞健，佢話想健仔返TVB拍劇，而同場嘅趙學而對舊愛謝霆鋒傳想同王菲再聯絡做朋友等事一概冇回應。
撰文：馮仁昭
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24