羅馬非一日建成，曼城領隊今季由文仙尼換成比歷連尼，加上大規模擴軍，立即被捧成英超奪冠次熱門，賠率比衞冕嘅曼聯更熱，但連續2場作客失分，比歷連尼已經飽受批評。
撇開對手實力問題，曼城英超開季4戰取得2勝1和1負，其實同曼聯與車仔同分，當然你可以講，曼聯失分畀利物浦同車仔，曼城只係失分畀卡迪夫城同史篤城，傷害性大好多。但睇番曼城𠵱家嘅陣容，儲儲埋埋一班前朝、甚至前前朝買落嚟貴價水貨，雖然球隊已經好盡力換血，但尼史葛、占士米拿等，個人認為佢哋踢英超中游球隊都勉強，只因𠵱家曼城傷兵多，新兵又未融入，先搞到搵呢班舊電池頂多陣。
而且曼城同主流英超球隊唔同，領隊唔係擁有絕對買賣球員權力，學歐陸球會咁，上面仲有總監碧格利斯坦睇住，曼城今夏收購新兵中，費蘭甸奴就肯定係水貨，又買唔到佢嘅愛將艾斯高，始終對佢組軍有影響。
講番比歷連尼資歷，由佢04年衝出南美登陸歐洲，到維拉利爾出任教練起，確實未有主要錦標，幫維拉利爾贏圖圖盃，唔算係；09年帶皇馬，擁有C朗、卡卡、賓施馬等新兵，一樣唔夠巴塞嚟。但要留意，當季皇馬都拎到96分，成為歷來西甲最高分亞軍，該季入波仲多過巴塞㖭！小弟相信，隨住曼城傷兵問題好番，球員適應比帥領軍嘅風格後，球隊會變得更強，拎唔拎到冠軍唔敢講，但帶曼城就肯定夠班。文：牽牛
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，
即刻收睇： http://bit.ly/appletalk24