法國喺歐洲籃球錦標賽8強，憑住效力馬刺嘅控衞柏加，貢獻全場最高27分，以72:62擊敗主辦國斯洛文尼亞，4強將會硬撼同日以30分之差，大炒塞爾維亞嘅西班牙，重演上屆決賽嘅戲碼！（有線62台及高清202台今日11:45pm直播）
柏加雖然20射只得9中，但係佢9個罰球有8粒得手，為法國攻入27分，再加上兩位老友迪奧同巴登合共攻入24分，最後以10分之差大勝斯洛文尼亞，令到主場球迷心碎。不過，柏加賽後話唔可以開心得咁早：「仲未可以慶祝住，今場係重要嘅勝利，但係球隊仲有其他目標。我哋想得到一面獎牌，𠵱家仲未到手。」
狂牛炒「塞」重生
佢哋4強將會硬撼衞冕嘅西班牙，而「狂牛軍團」同日就以90:60狂炒次輪E組首名塞爾維亞！西班牙喺次輪表現一般，令人質疑佢哋嘅奪標機會；但係今場一對皇家馬德里後衞洛迪古斯同費南迪斯，合共轟入41分，令到中鋒馬克加素可以唞一唞。效力木狼嘅西班牙金童盧比奧賽後就話：「我哋今場打得好有侵略性，喺時候話畀大家知我哋有幾勁！」
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24