周潤發、謝霆鋒、內地女星童菲和景甜最近合演王晶新戲《賭城風雲》，日前眾演員在元朗某片場拍攝煞科賭船對決場面，還即場影海報，由夏永康操刀，發嫂陪伴發哥左右。王菲跟李亞鵬離婚，有網民想霆鋒跟王菲復合，近日更傳霆鋒幾個月前曾寫信給王菲想恢復聯絡，但被女方拒絕及李亞鵬發現而鬧交。雖然新聞滿天飛，但現場見霆鋒心情不錯，不時跟人閒聊，只是略現疲態。
𢱑拍港產片
影海報時發哥gel好頭，穿上貼身西裝以賭神look坐在椅上，霆鋒則企後面，重現當年《賭神》發哥和「刀仔」劉德華的經典海報甫士，不過霆鋒問：「會唔會太過正經？」隨即在發哥頭上舉揸槍手勢整古做怪。
問到有否留意菲鵬離婚，發哥表示有，不過私下跟王菲不算熟絡，會否覺可惜？發哥認為一對夫妻決定離婚自有原因，外人不應給意見。提到有人想霆鋒和王菲復合，發哥即搞笑說：「你唔好倒啲橄欖油喺地畀我踩喎，我冇買防跣鞋，撻低好無辜。」
拍完此片發哥會稍作休息，他透露亦有其他新戲斟洽，當中包括港產片。提到近日港產片回勇，票房成績理想，發哥笑言：「我想拍㗎，有人搵我至得。」張家輝主演的《激戰》叫好叫座，他更為角色苦練朱古力肌，發哥直言：「有咁嘅效果辛苦都值得，肯咁大犧牲我好敬佩。」
在戲中扮發哥女兒的童菲表示首次吊威吔，幸好很快適應。至於景甜更有一場重頭戲：「要我在車內跟發哥示愛，拍之前我真的很緊張，有點不知所措，不過發哥真的很好，他跟我一同研究劇情，更叫我放膽去演，我盡情努力地去演出。」景甜大讚發哥友善沒有架子，不時提點她，她坦言今次自己真的獲益不少。
採訪：張俊銘
攝影：黃文偉
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24