在舞台淡定自若；在論壇雄辯滔滔；在議會據理力爭；公民黨陳淑莊（Tanya）的硬朗形象植根在港人腦海，不過來到飯桌，呷幾口紹興酒，Tanya才釋出真我本色，完全符合《亂噏24》的宗旨。最爆笑是蔡瀾曾擺烏龍，亂將人夫介紹給Tanya認識，事後回想仍有陣娘味。《亂噏24》足本版逢周四晚上11時播出，可在 http://bit.ly/appletalk24重溫。
撰文：馮國康、Sidekick
錄影前15分鐘，陳淑莊和老朋友蔡瀾已在摸「茶杯」底。原來這次飯局約了近一個月，看得出Tanya當日心情相當雀躍。呷了幾口紹興酒，便問：「咦，今日倪匡唔嚟？」說來話長。倪匡早前錄影梁詠琪的一集《亂噏24》，提到要接受白內障手術，但手術後在家休養時卻不慎摔了一跤，弄損了手腳。蔡瀾說：「佢食抗生素食到暈陀陀，嚟唔到。」Tanya雖有點失望，但聞到酒香便醒神，又不停與蔡瀾碰杯，蔡瀾笑說：「以前武松三碗打老虎，三碗你濕濕碎啦！」
遊捷克被搵笨
節目甫開始，Tanya便分享早前一個人孭着背包到中歐旅行的趣事。「最憎布拉格，因為俾人搵笨！」黎智英（肥佬黎）笑笑口問：「邊方面？」Tanya聽得出弦外之音，便說：「錢。唔會咁快騙感情住嘅！」肥佬黎笑着追問：「咁有冇碰到sexy男人呀？補番數先得㗎！」Tanya苦笑：「Sorry，未得住。成程冇呢個機會。」
肥佬黎認為一個人旅行較自由，衣食住行都不用遷就人。Tanya認同，但壞處是不敢亂飲酒。肥佬黎笑說：「醉咗就俾人……」蔡瀾搶說：「求之不得㖭啦！」Tanya雙手托腮扮尷尬。肥佬黎狙擊：「一次過就求之不得啫！困你十年八年嗰啲癲佬，你就大鑊啦！」Tanya被前輩欺負，只懂自嘲：「咁嗰陣時阿婆嚟㗎啦嘛，連最後一次機會都冇埋！」全場大笑。
肥佬黎和蔡瀾認為，背包旅行應選擇二星或三星的酒店落腳，肥佬黎說：「你去到lobby度，嘩好多靚女睬你喎！我永遠都係，兩星好，三星好，喺個lobby度叫杯咖啡，叫少少酒嚟飲，梗有人同你傾偈。」蔡瀾忍不住說：「反璞歸真，鮑參翅肚食慣咗，要食番清菜呀！」肥佬黎認為看風景固然重要，但人也是藝術，他甚至會跟陌生人食飯吹水，有時會有意外收穫。
遇正跳軌驚魂
Tanya這一程到訪了五個國家，除了捷克的布拉格，她先後到了Cesky Krumlov參觀文化遺產；再到奧地利Salzburg，踏足《仙樂飄飄處處聞》的拍攝之地；之後去維也納參觀博物館；再去匈牙利的布達佩斯，享受最美味早餐；然後到斯洛伐克行山、再到波蘭的Krakow集中營，最後到阿姆斯特丹搭飛機返港。雖然全程沒有艷遇，但Tanya的火車奇幻旅程可謂畢生難忘。
Tanya試過在三個國家，遇上同一對韓國夫婦。最邪門是，她搭火車往波蘭期間，有人跳軌自殺，正正伏屍其車卡底。Tanya說：「好驚，因為不停見到救傷車呀、消防員呀、警察呀，喺你後面走嚟走去。」
席間，蔡瀾忽然醒起有一匈牙利畫家朋友，他介紹的餐廳相當有水準，其中有間專做古老匈牙利菜式。蔡瀾手舞足蹈的介紹超美味牛骨髓：「佢將啲牛骨髓，呢頭同嗰頭用麵包塞住，塞到好實去燉湯。」Tanya已幻想到肉汁鮮香，搶着說：「即係全部（牛骨髓）喺晒裏面？一滴都冇漏過？哎呀！」然後失儀猛說：「好正呀！」
食指大動後，Tanya酒癮也大發，話題又回到靚酒上，這次旅行讓她接觸Absinthe這香草酒，一飲難忘：「聽講啲畫家呢……」肥佬黎插嘴說：「係咪綠色嗰隻？」Tanya驚訝對方都試過，肥佬黎淡淡然說：「好多high嘅嘢我都飲過。」Tanya只顧儍笑，又不停問這段能否出街。
一嚐迷幻烈酒
定下神，Tanya慢慢說出初體驗：「我就飲咗少少，冇乜反應，我諗太少，但好辣吓。嗰個人（酒保）望一望我，可能佢驚我一個人，佢話七十度，我話得㗎啦，少少我都得嘅。」此時蔡瀾才出聲：「呢隻酒𠵱家做咗出嚟已經冇幻覺，因為已經禁咗。嗰陣時梵高呀，好多文人呀畫家都飲，飲咗有幻覺。」肥佬黎問：「你有冇飲過有幻覺嘅？」蔡瀾微笑點頭，默默回憶年少往事：「背包旅行時候有。」
回憶起背包旅行，Tanya的確有衝動孭背包再去一趟，蔡瀾笑說：「人生有好多階段，背包旅行又係一個階段，到你差唔多臨尾，又係一個階段。但係賺錢係好緊要！不過你可以嫁個好有錢老公！」Tanya笑說：「仲有機？家陣都唔細囉喎！」蔡瀾答：「有有有，我有啲朋友好鬼有錢！」Tanya即掩嘴狂笑，並大爆蔡瀾做媒人的蝦碌趣事，她說：「直情係流到，去到人哋原來年幾之前已經結咗婚！個老婆大緊肚！真係娘到。」蔡瀾又叫肥佬黎介紹「儍儍哋」又「有錢」的朋友給Tanya，令Tanya一臉尷尬。
暴發食品生產商 茅招搶市場
http://bit.ly/talk241101
癲佬禁室培慾十年 陳淑莊驚變性奴
http://bit.ly/talk241102
路軌自盡 港背包客波蘭遇險
http://bit.ly/talk241103
三星酒店僻室 名人過癮無避忌
http://bit.ly/talk241104
老菜式發圍 牛骨髓風摩全城
http://bit.ly/talk241105
迷幻綠精靈再現 陳淑莊喜藏禁酒
http://bit.ly/talk241106
景區困獸鬥 九寨溝擺局明屈錢
http://bit.ly/talk241107
黑鑽石之鄉 富豪死前爭住去
http://bit.ly/talk241108
無錢照睇症 良心醫生救三代人
http://bit.ly/talk241109
中女危機 陳淑莊誤搭新婚夫
http://bit.ly/talk241110
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！