加里夫巴利同基斯坦奴朗拿度（C朗）雖然係皇馬隊友，但場外就為名為利鬥餐死，上次鬥衣裝，今次就鬥sponsor。係人都知C朗係「一剔」嘅象徵人物，巴利亦唔輸蝕，據報佢同「三間」續一份天文數字嘅合約後，有望成為佢哋嘅「1哥」，以抗衡「一剔」代表C朗。
巴利肥約續簽「三間」
巴利今夏以破世界紀錄嘅8,600萬鎊由熱刺轉投皇馬，破咗C朗嘅8,000萬鎊舊紀錄；而皇馬為免C朗唔開心，嗱嗱臨同佢續一份除稅後1,500萬鎊年薪嘅3年新合約，並令佢成為全球最高人工球員，呢個回合就打成平手。至於喺波砵贊助方面，C朗本來贏巴利幾條街 ，但後者同「三間」續約後有望平起平坐。
「三間」由巴利16歲開始就贊助佢，但因為呢位威爾斯球星肯定缺席明夏世盃決賽周，加上喺轉會前又踢唔到今屆歐聯，所以「三間」都諗緊今年約滿後唔續約。不過，由於「三間」係皇馬贊助商，加上巴利登上銀河艦隊後人氣急升，於是「三間」即刻開份天文數字嘅長約畀佢；家陣佢同「三間」嘅贊助費係每年200萬鎊，而喺續約之後，據報數字隨時多一倍，甚至兩倍都唔定。
C朗始終係「一剔」人，家陣皇馬有巴利呢個「三間」人，以後做嘢就方便得多。來自「三間」嘅消息人士表示：「之前碧咸效力皇馬時，我哋都係咁做，所以我哋相信同巴利簽長約，對皇馬、巴利同埋我哋都有好處。」
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，
即刻收睇： http://bit.ly/appletalk24