經過周中歐聯列強齊贏，獨車仔陣式一變再變、主場慘敗後，本欄決定暫棄「食神」摩連奴，估佢唔到的球隊不如唔好賭，兩支「藍軍」車仔和曼城仍未變完，買對家或避之則吉方為上策。由此推敲，今周決取曼聯，再串同是變動極少的阿仙奴作為投注重心；大勇的皇馬亦要拖一票。
除非你是C朗級數的打工皇帝，否則最好腳踏實地。看朗尼周中歐聯兩射一傳威風八面，賽後記者追問下，仍強調自己從未想過離隊，一直專心足球，與之前高調要求轉會，最後反口聲稱樂於留在利物浦的蘇亞雷斯，同出一轍。大跳草裙舞沒問題，落到場的朗尼交足百二分，與尹佩斯亦漸入扣；印象最深是上周對水晶宮一仗，10號在後場一記長傳予20號，只見尹佩斯一控一射僅中楣不入，若非如此，這記必定入選本季金球。
紅魔受讓極筍
紅魔霸氣不若費Sir領軍之時，勝在穩陣而費蘭尼作用立竿見影，在朗尼+尹佩斯大勇下，今周面對曼城至少不落下風。聯賽是漫漫長途，季初試準反而更有利，摩連奴和比歷連尼不可能不知遊戲規則，但現時非追捧對象。打吡從來利下盤，紅魔一季絕少受讓，今仗受讓平/半極筍，再買兩個紅魔贏的大波膽2:1及3:2，因季初兩軍氣力充沛也。
阿仙奴與曼聯一樣，在轉會市場「一擊即中」，簽下奧斯爾後變招能力大增，上仗對新特蘭贏得不好睇，卻打出決心，周中歐聯就連艾朗藍斯都打到如韋拉，不再花拳繡腿而入球不絕。今次對住近3季作客平均不敗率只得42%、中堅梳爾哥斯及賀夫轉身極慢的史篤城，幾球致命直線已夠贏！至於皇馬周中大勝6:1，最難得是加里夫巴利識「走位」，與迪馬利亞一樣，睇住C朗交波，令大哥「龍顏大悅」，整體上下一心，對基達菲[-2]都有殺冇賠。3場重心由周日8點半開始，至皇馬凌晨3點前打完，一條3串1夠玩足成晚了。
文：仙道彬
《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，
即刻收睇： http://bit.ly/appletalk24