網絡作家向西村上春樹上年憑作品《一路向西》爆紅，呢本書仲俾蕭定一投資改編拍成三級片3D《一路向西》，向西今年書展再推出驚慄情慾小說《含忍．死人．的士佬》，依然受歡迎，呢個故事最近俾電影《爆3俏嬌娃》監製黃永峰（Charlie）睇中，稍後會監製成同名電影《含忍．死人．的士佬》，由新晉導演梁子明操刀。劇情講述中年漢事業失意淪為變態的士司機，佢某次車咗曾折磨過佢嘅前老闆個囡囡，的士佬趁個女仔醉倒將佢先綁架後撕票，計劃得天衣無縫，的士司機得到贖金逍遙法外，仲改行做生意，可惜經營不善，受挫折後畏罪自首。
Charlie年底開拍《含忍》，該片斥資800萬，佢噚日話：「的士司機意屬李治廷或徐天佑，的士司機女友係Jeana，佢哋會有情慾戲，至於初戀女友係《盂蘭神功》嘅大馬新人李元玲。」
喪煲《人肉叉燒包》
原著小說有齊血腥、暴力同粗口，《含忍》一片暫定IIB級，Charlie唔排除加料升到III級。Jeana話唔怕拍驚慄片有陰影，佢話：「我呢排煲咗《人肉叉燒包》同《的士判官》，研究吓點扮驚嚇。」
撰文：馮仁昭
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24