有「深圳李嘉誠」之稱嘅內地富商黃楚標，近年涉及多宗政治事件而為港人熟識，佢最近仲正式成為DBC數碼電台大股東。可能貴人事忙，佢自2011年3月出任信置（083）兼同系信和酒店（1221）獨董，竟然冇出席過董事會，難得主席黃志祥冇異議，唔知小股東又點睇呢？
袋走43萬袍金
根據信置同信和酒店2011至2013年年報，兩間公司每年舉行4次董事局常規會議，黃楚標嘅出席率係零。
黃楚標身兼信置審核委員會成員，亦冇開會。2間公司、3個年度合共43.4萬元董事袍金，黃楚標就咁輕鬆袋走了。
黃志祥曾經喺年報話過，「黃先生的淵博學養及豐富經驗定會為集團帶來莫大裨益」，相信小股東一定想知道呢位冇開會嘅獨董過去幾年有乜貢獻，話唔定佢冇開會箒，私底下畀咗好多意見黃志祥都未定。
不過，上市規則《企業管治守則》寫明，獨董同所有非執董一樣，應定期出席董事會同委員會會議。而且，每位董事應確保有足夠時間同精神處理上市公司嘅事務，否則就唔好應承做獨董。
黃楚標在港只係做呢兩間上市公司董事，佢跟黃志祥同樣係香港友好協進會董事。呢個會其他董事全部都係城中政商界知名人士，佢哋近日咪有代表團去北京見港澳辨主任王光亞囉。
李華華
mailto:[email protected]
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24