女神tea time:贈送月餅 講氣派 - Fifi

女神tea time:
贈送月餅 講氣派 - Fifi

月餅都要講潮流,以前就話食冰皮就可以「飛甩老土」,𠵱家冰皮都out out哋啦,補上最潮月餅之位嘅,一定係間間酒店都爭住出嘅奶皇月。
到目前為止,菲菲已經試食過幾間酒店出品嘅奶皇月餅,仲選出「今年最應該轉贈月餅」,佢就係……年年都爭崩頭,大酒店(045)旗下半島嘉麟樓。
原因好簡單,一來嘉麟樓奶皇月,今年就算一盒賣到485蚊一盒,仍然搶手到有錢都買唔到。如果你將呢盒咁矜貴嘅月餅,送到去親友嘅手中,絕對凸顯「blue blood」氣派。
肉赤嗎?食月餅最梗要好食,以前嘉麟樓就話食過人人都讚好,但今年唔知係唔係換咗個利苑師傅,味道比以前差一截,反而半島、文華、Ritz Carlton更值「增持」。論氣派嘉麟樓贏晒,講味道佢又輸,最應該轉贈月餅,非佢莫屬啦。
不過,由嘉麟樓決定將奶皇月加價九成開始,味道係點已唔再係重點,因為佢已成為名牌,係身份嘅象徵。單係睇大酒店上年月餅收入達5,300萬,就知大酒店方面,只會諗點推高毛利。覺得冇咁好味?Who cares?

Fifi
本欄逢周二、四刊出

熱血青春電影《狂舞派》席捲今夏,柒良同阿花嘅夢想去盡未?
男女主角聯同導演黃修平齊上《亂噏24》,動Live預埋你!
http://bit.ly/appletalk24