誠哥突然現身傳媒飯局，大談長和系業務、本港樓市以至政經大事，將之前原本喺長和系記者會想講嘅嘢，一炮過同大家分享，間接證明其實佢係好想同記者交流，至於有乜原因或者乜人可以阻到誠哥暢所欲言，相信大家心裏有數。
二線濠賭股繼續瘋炒，多間賭股表示有興趣進軍日本，令升勢火上加油。本欄多番推介嘅澳門餐飲股佳景（703），亦乘勢炒高4.5%，兼且突破2.5元阻力區，中線繼續向3元目標價進發！
本欄見報之時，儲局已公佈其退市第一步，但呢期個市嘅焦點，已經落喺下任儲局揸fit人大熱嘅耶倫身上，亦意味退市步伐可能放慢。加息預期降溫，令一眾以高息作招徠嘅REITs由谷底反彈，其中置富產託（778）蓄勢突破下降軌，值得留意。置富由5月高位8.61元，一直跌至本月低位5.89元始見喘穩，其間累積跌幅達32%，已完全price in退市因素，耶倫上任勢延續伯老放水政策，肯定成為置富反彈嘅催化劑。現價息率5.6厘，市賬率0.7倍，投資價值重新浮現。倘突破5月以來降軌，用黃金比率反彈0.382倍作目標，可見6.93元，潛在升幅12%，絕對博得過。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange