馬德鐘、鍾嘉欣、黃智雯、羅仲謙同苟芸慧等前晚喺尖沙嘴出席無綫劇《飛虎II》煞科宴，馬德鐘自掏腰包畀五位數字埋單，眾人大合照時大叫口號：「Delay No More（唔好延遲）！」原來除咗想套劇唔好咁遲出，仲借意講諧音粗口。馬德鐘解釋：「拍劇過程好辛苦，好似打咗場仗咁，呢個係大家心聲，要正常發洩！」佢話暫時唔敢諗拍第三輯，要睇吓第二輯反應先考慮。有傳林峯離開無綫自組公司？馬德鐘話諗過開公司，不過要配合好多因素。
嘉欣BB有冇講諧音粗口先？佢話唔敢，仲話前晚先知有個咁嘅口號，唔怪得啲人叫嗰陣，嘉欣BB好似嚇一跳啦。再問有傳林峯自組公司，仲話撬走徐子珊？曾經同林峯傳緋聞嘅嘉欣BB就話：「係咪㗎？佢冇撬我，我忠於TVB，合約仲有一段時間。」另外，近日有傳苟芸慧同岑麗香爭上位不和，苟姑娘否認：「我有同香香傾呢件事，仲話不如我哋喺人前French kiss（濕吻），不過如果個個傳不和都錫咪好唔得閒！」苟姑娘話之前媽咪做手術，想抽時間陪媽咪：「我心理生理都有事，想休息吓。」
黃智雯鍾意按胸
黃智雯喺劇中同謙仔有好多親熱戲，因為大家好老友，所以有尷尬。另外，黃智雯噚日以代言人身份喺旺角出席纖體美容公司開幕活動，今次除咗有六位數字酬勞，最開心係每個月慳番四位數字以上嘅spa費用，因為佢每個月都會按摩，最鍾意俾人按胸，黃智雯話：「我比較鍾意俾人按胸，可以預防疾病，按得多仲有豐胸作用。」
版主：陳基征
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24