原來市面上有一隻好低調嘅珠海幫股份，呢隻就係中國上城（2330）。中國上城前身叫紀翰集團，喺2009年好低調地轉咗手，當年紀翰收購咗珠海中珠房地產開發持有兩個位於珠海市嘅房地產項目，而當時收購代價有部份係以發新股方式支付，而最後導致股權轉移至珠海中珠集團大股東許德來同珠海市叠石飲食董事長何敏雄手上，而最近中國上城進行咗多項資本動作，包括賣走上述提到嘅珠海市嘅房地產項目，套咗5億幾人仔，同埋贖回2.3億元嘅可換股債（CB），應該係為咗進行一單大注資而做準備，而近日股價呈異動，要睇實。
股價蠢動 潛在升幅45%
簡單介紹一吓珠海中珠先，珠海中珠係中國建設部同中國房地產協會，牽頭喺珠海成立嘅一間大型房地產開發企業，佢主要股東分別係珠海經濟特區西海集團、中國城鄉建設發展總公司、廣州市城市建設開發集團、廈門市房地產、深圳市投資控股、廣州珠江實業開發、天津市房地產發展等國內有來頭嘅地產業巨頭。淨係聽呢啲名，都已經夠照啦！
買股票，好多時都要睇個大股東嘅成本價嘅，睇資料，佢哋手貨都唔平，就2009年8月第一次注資，每股作價1元攞咗2.47億股，跟住2010年12月，再注資，用可兌換優先股作價，每股係0.811元，但現價先係0.56元，即係現價買入嘅成本價仲平過大股東個成本。仲有喎，睇聯交所資料，許德來𠵱家揸咗中國上城32.91%股權，而對上一次增持係今年3月13日，當時嘅增持價係0.455元，從佢嘅增持動作嚟睇，應該係有嘢做。
事實上，係佢增持過後，公司即刻有做嘢，首先喺今年5月以5.6億人仔，出售當年注入嘅珠海物業權益，仲賺咗1.64億人仔，即刻執靚咗公司盤數，尤其個負債表，今年個中期負債率由去年底嘅3%降至最新嘅1.7%。另外，即刻將個NAV提升，計番港元，每股有0.69元。喺今年7月，公司又提早贖回本金總額為2.3億元嘅CB，𠵱家一股CB都冇。連串動作，唔好話畀我聽係冇嘢搞囉。
話口未完，上個月27日，公司想買廣東茂名一塊9.3萬平方米嘅地，但未有作價，不過呢塊地嘅持有人有一條達4.52億元人仔街數，唔好搞錯，係人哋欠佢，可以放得4億幾銀出街，肯定係猛料，公告話，買呢塊地就會要連埋呢條貸款買。留意，地點係廣東，而珠海中珠其中一個股東就係廣州市城市建設開發集團，有啲嘢喎！講到呢度，應該明啦！梗係有大茶飯跟尾。
技術走勢方面，中國上城呢幾日蠢蠢欲動，好似想突破大長形阻力0.57元個位，不過正如上述所言，無論大股東嘅每股成本同NAV，都高過現價，現水平買入好舒服，短線不如就先睇佢上一次個注資價0.811元囉！潛在升幅45%。
陳承龍
本欄逢周四刊登
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange