熱火「大帝」勒邦占士早前同喺高中已經拍拖嘅青梅竹馬莎雲娜（Savannah Brinson），喺加州聖地牙哥市結婚之後，周二就出發到歐洲度蜜月，仲揀咗意大利首都羅馬；兩人喺機場全程十指緊扣，係人睇見到羨慕死！
大帝嫂喺婚禮之前接受訪問時講過既興奮又緊張，大帝就話自己角色好簡單：「我只係要令到莎雲娜喺呢個大日子得到佢最想要嘅嘢，一個佢心目中最理想嘅婚禮。」大帝跟住快艇前鋒班尼斯、多蒙特前鋒羅拔利雲度夫斯基等人，成為老襯之後，就同老婆兩個人去咗度蜜月；雖然佢兩個8月底先去完法國南部慶祝女方嘅27歲生日，但係歐洲不嬲都係旅遊聖地，去完法國咪去意大利囉！
十指緊扣如出巡
話明大帝出巡，梗係要有一大班人服侍啦；佢兩公婆周二去到羅馬，喺機場已經有一大班職員貼身服侍；由出機場到上車，都有人跟住執頭執尾，大帝同皇后戴住副黑超，淨係拎住袋就得，多咗隻手點算，拖住對方咪得囉。佢兩個雖然已經拍拖多年，感情已經昇華到老夫老妻嘅地步，但係依然全程十指緊扣，真係慌死人唔知佢兩個有幾愛對方。不過，勒邦占士一直戴住個大耳筒，冇乜同老婆講過嘢，睇落都幾異相。
阿媽拖新歡到賀
佢哋已經有兩個囝囝，但係今次度蜜月冇帶埋小朋友去，咁小朋友邊個睇住？唔使驚，仲有大帝媽歌莉亞嘛，佢仲有新歡Da Real Lambo幫手，應該就冇乜問題。正職係rapper嘅Lambo只係大28歲嘅大帝3年，但係同大帝媽如膠似漆；佢兩個喺大帝婚禮，仲要唔理唔准帶手提電話嘅禁令，喺會場入面攬埋一嚿咁影相（下圖）。我求大俠覺得咁做唔係幾好囉，就算你係聯盟現時最佳球員個阿媽，都要跟吓規矩，唔好要個仔難做先得㗎！
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24