今時今日開電話會議係家常便飯，話明用電話開會，即係可以一心幾用都得。金融招聘機構eFinancialCareers今年7月訪問咗659位在港受僱嘅銀行同金融才俊，就發現六成人開電話會議時唔專心，多數一邊開會，一邊上網、食飯，仲有人瞓喺床上開會。
eFinancialCareers亞太區董事總經理麥仁杰認為，雖然本港金融才俊唔專心開電話會議，但唔等於懶，放工後通常要繼續搏殺，其他地方，好似悉尼人做嘢係好搏，有啲人直情唔食晏，但5點36分就執嘢走㗎喇。
阿麥又話，智能手機普及亦令到打工仔冇藉口玩失蹤，特別係跨國企業，例如紐約同香港兩邊都有辦公室，相差12粒鐘，如果5點開會，其中一邊就要朝早起身開電話會議。咁辦工時間以外開多啲會，係咪升職快啲？佢就話兩者冇關喎。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange