宅男女神周秀娜向來以肯博肯捱見稱，佢嘅事業心同事業線一向都係咁強勁，前排娜姐投資咗七位數字，搞咗個內衣品牌LA MIU，正所謂肥水不流別人田，升呢做咗老闆嘅娜姐一啲都唔錫身，親自上陣做生招牌，近排仲做埋形象顧問，指導啲模特兒拍內衣硬照。
唔少模特兒第一次拍內衣廣告，表現梗係有啲怯怯哋，娜姐就好有耐性教佢哋擺啲誘人甫士，仲好大方咁分享以前做模特兒嘅心得，認真有大家姐風範。
對鏡練表情
娜姐話：「我啱啱出道做模特兒都唔習慣對住鏡頭，結果啲姿勢生硬，笑容又勉強，於是我咪同啲前輩同攝影師請教，得閒又多啲對住塊鏡練面部表情。冇嘢係可以一步登天，要不斷增值同學習，呢啲先係邁向成功嘅秘訣！」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！