雖然九龍倉（004）最近輸畀新鴻基地產（016），投唔到上海徐家匯嗰幅靚地皮，但係應該唔會影響到九倉主席吳光正嘅好心情，事關佢本月初榮升外公，據聞佢位千金吳宗恩（Jennifer）本月初生咗個女，吳光正可以閒時弄孫為樂，生活夠晒寫意。
舊年做外父
35歲嘅Jennifer替家族掌管零售業務接近10年，現為連卡佛主席，但佢向來低調到不得了，甚少出席派對活動，偶爾出席公開場合都只係俾傳媒影相，對於提問通常十問九唔應。佢舊年同英籍律師馬健能（John Paul Mclellan）喺英國結婚。今年6月連卡佛有份投資嘅Topshop喺中環開幕，Jennifer身懷六甲出席開幕酒會，估計當時佢懷孕六、七個月。據聞，佢本月初已經生咗個女，吳光正可能尊重女兒鍾意低調，做咗外公都冇話大鑼大鼓，只係見到熟人先至輕輕提起自己抱孫。
睇番城中大孖沙，最多孫仔孫女可能係長和系主席李嘉誠同恒基地產（012）主席李兆基，誠哥大仔李澤鉅有三女一仔，次子李澤楷又有三個仔，夾埋七個孫。四叔淨係兩個仔都生咗六個孫畀佢抱，都仲未計外孫，過時過節所有孫仔一齊玩認真熱鬧。
恒隆地產（101）主席陳啟宗個仔陳文博前日話，工作忙到唔得閒搵女朋友，陳啟宗要抱孫就要等等了。
李華華
mailto:[email protected]
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24