十多年來由《午夜凶鈴》到《貞子3D》，怨氣始終未散！最新一集《貞子2：鬼胎輪迴》更趁住電影明日上映，率先推出睇得又摸得的貞子密室遊戲房，親身踏足這驚嚇場面！最嚇鬼係你要跳入古井解謎，或打開機關，隨時弄到滿手頭髮，真係細膽啲都被佢嚇死！
記者：陳國輝 攝影：陳國良 模特兒：Icy@Zmodel
搜奇社×《貞子2：鬼胎輪迴》主題密室遊戲房
地址：觀塘偉業街138號和勝記工業大廈10樓
查詢：2389 0304
收費：$188/位
人數：4-6人
限時：45分鐘
電影Check Point逐一睇
《逃出香港》一類唔使標住汗玩，位置又就近嘅密室遊戲，近期Hit爆！而搜奇社聯乘《貞子2：鬼胎輪迴》的主題密室遊戲房，最大賣點係喪玩貞子經典場面，共分成五大場景，有幾逼真？即睇！
產房
上回講到，孝則救回鮎川茜，以為從此脫離恐怖纏繞，點知生完個女，跟住佢就離奇死亡！至於產房內的小女孩，傳聞就係貞子借屍還魂。
相似度：★★★☆☆
吊橋
劇情例牌要走去偏遠的荒島，尋找真相以化解貞子怨氣，雖然呢條密室製作的吊橋，氣氛陰森兼恐怖，但其實只有數米長，幾步就行晒，唔夠喉！
相似度：★★★☆☆
古井
《午夜凶鈴》系列至經典的古井，密室版都搵到！最令人反胃係當你跳入井，裏面通道唔止又長又窄，仲要有貞子頭髮！
相似度：★★★★★
畫牆
原來貞子細個好鍾意畫畫！因此密室設計了一個小朋友畫廊，驚嚇位係你一用電筒照住，耳邊就傳來指甲抓牆聲。
相似度：★★★★☆
教堂
出現於片尾的經典場景，就係披頭散髮的貞子趟於教堂一幕！密室實際空間當然無咁闊落，但聖母像的擺放位置與房間的佈局，感覺相當認真，抵讚！
相似度：★★★★☆
45分鐘內合力解謎
今次搵咗膽生毛嘅恐怖熱線靚女主持Icy，單拖入密室試玩！老實講，佢真係見識過唔少「大場面」，印象最深係去過加拿大PNE樂園鬼屋，嗰度規定唔准開電筒，只能用手摸住牆走，摸到乜根本無人知；甚至乎，佢曾經組隊深夜入爛屋探靈，今次區區一個密室，佢直言嚇佢唔到！
不過，Icy玩完之後都覺得難度頗高，因為要成功過關，除咗要解謎，還須以先後次序打開機關掣，才可通過另一密室。換句話講，唔止你要有智慧，仲考驗你同幾位隊友的合作性和默契；雖然，呢五個主題密室地方唔算好大，但要喺45分鐘內完成，確實不容易。
日本正版貞子鬼屋 嚇到笑！
如果港版貞子嚇你唔到，咁正版又驚唔驚？位於東京台場的Joypolis，唔單止係SEGA主題樂園，最近仲新開咗「貞子3D 2」主題鬼屋，勁玩虛擬實景概念！
從介紹片段睇到，一開始，貞子先帶你走入伸手不見五指嘅鬼屋，途中佢會用唔同方法來嚇你，然後加入一些數碼特技，睇片都覺得過癮！而走出鬼屋之後，貞子更會不時在Joypolis喪玩拍子機或者跳舞機等遊戲，你唔好走去騷擾佢喎！
日本獨家 手機齊嚇
入戲院熄電話又或者調校震機，都屬例行公事。但製作《貞子3D 2》的電影商，卻通過每一部觀眾手機，來實現《午夜凶鈴》系列中所出現的離奇事件，包括古怪手機鈴聲以及怪碼訊息，實行睇戲玩手機同步進行！
玩法係入場前先下載貞子手機App，睇戲時開着佢，你部手機就會跟住唔同情節，突如其來嚇你一跳，包括接到角色打來的電話、閃光燈胡亂閃爍、手機突然發出恐怖叫聲，甚至在電影結束時，可能會接到神秘的「鬼來電」！可惜，呢項新玩意只在日本本土上架，香港暫時無得玩！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange