承認出櫃嘅黃耀明，之前接受梁梓禧（前名梁奕倫）同茜利妹主持嘅now節目《攣直後援會》第一集訪問，節目日前已經播出，噚日明哥同袁彌明、慢必等喺大角嘴出席記者會，梁梓禧今次借節目承認出櫃，佢話都有請教明哥點同家人交代，話自己其實都未正式同家人講，明哥就教佢如果冇刻意問，睇完唔出聲就算，如果刻意問，想解決先坐底慢慢講。
帶美男見家長
明哥仲笑話：「佢（指梁）話佢有個美男男友，快啲帶佢返屋企食飯啦！」梁梓禧笑話：「美男都搞唔掂我老竇喎，我諗住明哥講咗，當幫我講咗喇。」梁梓禧話最終節目出街父母都冇出聲，不過講咗出嚟負擔細咗，可以繼續勇敢行以後嘅路。
明哥話節目中有女同志話自己好坎坷，另一半鍾意番男仔，明哥話：「我唔會諗呢個問題，如果知對方線路唔同，我會好快走人。」明哥又話近排都好多人問佢感情問題，慢必都成日向佢討教，佢又提醒大家同另一半唔使成日見，見得多都會悶，要有新鮮感。
已從政嘅袁彌明𠵱家有位政界男友林雨陽，佢話大家拍拖四個月，暫時未諗結婚：「𠵱家仲有人以為我同慢必係情侶檔，雖然有TB追過我，但我目標好清晰，我鍾意男人。」
版主：陳基征
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24