張家輝同彭于晏主演嘅電影《激戰》，截至前日上映32日票房收4,100萬，成績非常好，電影公司前晚喺九龍塘筵開10席搞慶功宴，家輝、彭于晏、導演林超賢同盧覓雪等出席，盧覓雪搞笑話：「戲中肥婆未食到賤輝，如果有續集，我可唔可以跟佢學解鎖。」家輝搞笑話：「呢啲床上做先得。」彭于晏話如果票房打破到台灣電影《那些年，我們一起追的女孩》當日喺香港嘅6,100多萬票房，做乜都肯，佢仲同家輝開心到即場扮咀嘴。
唔想老婆俾人咀
彭于晏俾人話佢講廣東粗口相當流利，佢扮懵話：「乜嘢呀？唔係。」飲到面紅紅嘅家輝玩踢爆兼爆粗話：「唉，唔好扮X晒嘢喎。」對於票房，家輝話：「拍咗廿幾年戲，第一次有過4,000萬，點都會有（續集），但未必係同故事，成數高。」係咪想票房超越《那些年》？佢話：「睇走勢未必得，打破自己紀錄都好。」提到歐陽震華講笑話向家輝發毒誓，知同佢老婆關詠荷冇咀戲先拍無綫劇《情逆三世緣》，家輝話：「呢啲誓我一直都發，我拍啲打戲槍戰都冇咀，老婆就盡量唔好。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！