嚟咗香港個幾月之嘛，美國駐港總領事夏千福已經有唔少粉絲，好多人日日上美領館facebook追住佢最新行蹤。唔少政界中人話夏千福厲害之處在於善用網絡，日日po啲落區親民相，點會唔人見人愛？據聞夏千福會繼續網絡攻勢，嚟緊約見知名博客以及喺網絡媒體有影響力嘅人交流；相信第時北京再轟佢干預港務，呢班網友或可以搞網絡戰幫佢還拖。
蓮香居見食評家
查實福伯約見博客嘅行動已經悄悄展開！就喺上周，美領館喺facebook專頁，轉載一位飲食博客嘅相片，話「總領事夏千福今個禮拜同咗班專寫食評嘅博客見面」，地點就喺上環德輔道西蓮香居。若非博客率先上載同福伯同枱食飯嘅相，美領館未必公開呢次密會博客詳情，所以冇人知福伯至今其實已經見過幾多個博客。
而喺呢個時候，美領館亦好高調為夏千福拉線。話說佢哋嘅新聞處，近日不斷向網上媒體同團體嘅負責人，例如《主場新聞》，以及喺網上有影響力嘅知名博客招手，索取佢哋嘅聯絡方法同資料，話日後有機會嘅話會邀請佢哋同夏千福見面。
八方唔知夏千福此番舉動，係咪想喺輿論陣地搶攻吖，但幾乎可以肯定，中方一定又嬲㗎嘞，左報肯定預留版位，日日開火炮轟，唔知呢班獲邀嘅網絡好友，有乜嘢反擊絕招呢？
李八方
MAILTO:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange