油尖旺區議會京士柏選區早前因為涉及種票事件,被法庭判決原議員梁偉權嘅議席無效,結果要補選,提名期本月19日結束。𠵱家已經有三個人報咗名,分別係自由黨符傳富、民協林健文同報稱獨立但實質獲西環支持嘅鄧浩斌;原來主打本土主義嘅激進組織「調理農務蘭花系」都有意加入混戰,前日仲落區收集提名㖭。
蘭花系嘅啤梨話,已經攞到十幾個簽名,但佢哋仲考慮緊選唔選,皆因仲未有系友肯認頭出戰;若最後傾唔掂,可能要抽生死籌㗎!
啤梨話呀,蘭花系參選都預咗輸,旨在藉此機會講吓雙普選理念,話晒京士柏喺旺區,相信喺大街小巷做論述,都唔會俾人告非法集結。
熱血青春電影《狂舞派》席捲今夏,柒良同阿花嘅夢想去盡未?
男女主角聯同導演黃修平齊上《亂噏24》,動Live預埋你!
http://bit.ly/appletalk24