基斯坦奴朗拿度（C朗）嘅世界轉會費紀錄俾隊友加里夫巴利打破，皇家馬德里為咗氹番呢個巨星，點都要畀番個第1名佢；周日皇馬就同C朗續約3年至2018年，年薪據報就加到除稅後1,700萬歐元（約1.8億港元），日薪超過47萬港元，返一日工就夠買架寶馬3系。
28歲嘅C朗周日就喺巴拿比奴球場，同球會主席佩雷斯進行簽約，簽完約仲同佩雷斯、布達堅奴等球會高層一齊食晏㖭。官方未有透露C朗人工，但據西班牙《馬卡報》報道，C朗年薪達1,700萬歐元，有心水清嘅西班牙記者，計到C朗約46,000歐元日薪，比較西班牙一般打工仔月薪得1,600歐元，足足多28倍。
我求大俠驚香港球迷唔夠清楚，換番成港幣，C朗一日就收47萬幾，可以喺香港做啲乜？玩車，可以買架寶馬3系玩吓，或者買5隻「地通拿」派街坊，再唔係夠錢買11支82年Lafite。如果C朗想開大餐，富臨阿一鮑魚有約1,500蚊嘅一人套餐，已經有鮑魚、有翅，C朗可以請300幾人食，再唔係，買5,000幾碗人氣日式拉麵，或者兩萬幾個老麥餐，分畀啲有需要人士食都好啦！
皇馬代交重稅
完成續約後，C朗就成為世界第1高薪球員；其實之前紀錄者係伊度奧，原本出緊安治2,000萬歐元年薪合約，但安治財政爆煲，伊度奧亦都去車仔落班，「1哥」地位先俾C朗取代。金球獎成日輸畀美斯，不過今次C朗年薪高美斯100萬歐元，都叫出番啖氣。
C朗當然好識做，續約後講到明希望留效皇馬直至退休，而佢喺皇馬亦已累積攻入204球，以目前走勢，好大機會追到魯爾嘅323球入球紀錄。不過皇馬為咗留人就要使好多錢，事關「碧咸條例」已經取消，西甲外援稅率由24%變成52%，即係皇馬連埋交稅，足足1年就要畀4,000萬歐元，先夠出糧畀C朗。
巴利想租奧斯爾別墅
講完C朗又點可以唔提巴利，「地標」戰入波嘅佢，𠵱家仲喺馬德里住緊酒店，不過已經搵緊樓，佢仲對奧斯爾之前住緊嗰間別墅好有興趣，想承租落去；巴利已經睇過樓，對家居電器都好滿意，只要少少裝修就入得伙。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange