【尖沙嘴】今日係蔡少芬（Ada）40歲生日，前日佢帶埋兩歲大嘅楚兒及5個月大嘅信兒，同大班親友食晏慶祝，但唔見Ada老公張晉出現，唔知係咪同周潤發拍緊電影《賭城風雲》嚟唔到呢？前日Ada仲買埋生日禮物，就係近期流行嘅BB孭帶hip seat！
錫腳仔𠱁B
前日下晝兩點半，Ada揸住七人車載住兩個寶貝女同親友離開元朗錦綉花園寓所，之後成班人去到尖沙嘴海運大廈一間西餐廳，見Ada阿姨同班親友成10人喺現場，非常熱鬧。佢哋邊食邊傾偈，點知食食吓信兒狂喊扭計，一位女親友就抱住信兒行出餐廳𠱁佢，當時信兒額頭貼咗塊退熱貼，唔知係咪有啲發燒呢？不過應該唔係大問題，如果唔係Ada都唔會帶佢出嚟威威啦！
信兒不停咁喊，個女親友搞唔掂，於是由Ada阿姨出馬，佢將信兒放喺BB車，然後錫腳板狂𠱁，最後信兒都肯收聲笑番。食飽飽後，Ada抱住信兒離開，楚兒就坐喺BB車由其他親友推住。佢哋同Ada提早慶生日後，再陪Ada買BB用品，揀咗個半鐘，Ada買咗BB衫同一條近期好流行嘅hip seat，由於佢抱住細女行街抱到手軟，於是索性即買即用㖭！
採訪、攝影：朱志聰、陳俊強
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！