以下所講的食飯規矩，放諸四海皆準，任何環境場合都一樣通用又適用，包括自己家族尤其有長輩出席的聚餐，不厭其煩提提大家，父母乃是長輩，不是阿四！
其實公司搞聯歡聯誼活動，現實中大部份的確是吃力不討好，出錢出力，還要被員工白眼嫌三嫌四毒舌批評勞民傷財，去高尚地方搞大佢又被話扮晒嘢累人使錢買衫賠笑為公司充場面。搞得細又被話寒酸，畀餐好嘅啲員工食都唔捨得，咁差寧願返屋企煮麵食好過。之不過唔搞，又多多聲氣話公司孤寒又刻薄，咁辛苦做嘢連請食餐飯慰勞吓都冇！
公司請食飯，不管是甚麼性質都是公務，只要榜上有名，都必須主動愉快配合地出席。「唔去得唔得？」記住唔問得！主角是人不是食物，食物是陪襯，好食食多啖，唔好食都要食，講完。至於點菜，晚宴一般公司都會預先點好，要是食晏飲茶之類，除非講明員工可以自行點選，否則絕不可以自己揸主意。即使要叫，亦要等齊人才叫。一心攞着數唔貴唔叫是極其小家的行為，個人品德品格，表露無遺。
座位編排公司有安排的就遵從，不要麻麻煩煩要調位要求和誰同座，甚至極之冇禮貌，要求同席人離座讓位。要是只訂了圍數沒有安排座位，記住最中間的一枱是主家席，背靠牆壁向着門口的座位是主位，必須留給當日出席的最高層座。除非被邀，又或者不知該座哪兒，先問問安排飯局的部門同事最穩陣。
主家席的人未到，除非得到通知，不能先上菜先食。除非大家很熟絡不介意，否則記得用公筷。不得飛象過河揀餸食，不可以只顧挑最好的自己食，應把最好的留給他人，別人幫你挾菜即使不喜歡食亦要多謝。要是涉及宗教信仰或者任何原因要戒口，一上菜請先講明，但千萬不能說教或批評其他人的飲食喜好及習慣。
斟茶要主動，不要像大爺般等人侍候，或者只斟自己那杯，還要留意不能隨便斟，搞清楚究竟是哪一個壺甚麼茶。自己冇所謂，不等如其他個個都冇所謂。席間不能低頭只顧吃，還有不能玩電話或者聽歌睇影片，簡直是無禮之極的行為！
不要以為食餐飯之嘛很簡單，當中可以看得到的絕不簡單。連食餐飯都覺如此無聊勉強，其人一定不合群兼且做事獨行獨斷，要是老闆確實奈佢唔何不過即使唔乞人憎，都肯定不容易相處。從食相從餐桌禮貌可知出身家教，是個自私還是大方的人；從眾人的投入程度可知管理層是否得人心。只要細心留意，一切都唔簡單！
本周Son姐醒你：「五色令人目盲；五音令人耳聾；五味令人口爽；馳騁畋獵，令人心發狂；難得之貨，令人行妨。是以聖人為腹不為目，故去彼取此。」
Son姐
「Son姐」 Alison張慧敏，以獵頭人身份縱橫職場幾十年，有智慧冇美貌有份量冇身材，人稱「魔鬼教練」！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange