三年前聽到一位朋友之朋友之現代三遷故事，令人傷感，古有孟母三遷，是為了兒子讀書上進，今人三遷，卒之遷到紐西蘭，並非為了兒子求學，亦非避秦，而是「K仔猛於虎」，家長為免兒子俾K仔毒死，唯有放棄本港專業事業，移民彼邦，重新嚟過。
點解搞成咁，皆因兒子在國際學校受不住同輩誘惑及壓力，染上K仔癮，父母搬家三次，改埋學校，朋輩及毒販仍然找上門來，父母最後唯有壯士斷臂，帶埋兒子遠走高飛，專業及生意上之犧牲，無數可計。
呢日碰到一位社工，原來佢對年青人索K，索冰呢回事，知之甚詳，於是問吓佢最新情況。社工話自從推行學校驗毒計劃之後，學生索K之人數，逐漸減少，此是可喜現象，但另一方面，估計本港有三萬幾人有21世紀毒癮（非傳統道友），而且難以追查，故此「毒齡」較長（即吸毒年數），極令人憂慮，二十年後，香港醫療系統除咗窮於應付人口老化帶來的老年病外，還要醫療一大批可能會患上肝癌、膀胱癌之中年人，事關索K兩年左右，就會導致膀胱硬化、小便失禁，肝病頻生。日日索K，男生二十零歲就會陽痿；除肉體疾病之外，年青男女索K不改，會導致父母容易患上抑鬱症（其實主角亦會，不過佢地掛住索K，萬事不理箒），精神大受打擊。
社工舉咗兩三個實例，令左丁山聽到毛骨聳然，例子一：二十歲索K女子每五分鐘要小便一次，要着紙屎片，猛噴香水防臭，後給僱主發覺，立受辭退，回家後，當然難以再搵工，唔敢出街，坐在客廳睇電視了日，母親受不了，睇精神病醫生。何解坐在屋企仍有K仔？社工話，販子送貨上門，交貨到門口鐵閘，女子從WhatsApp知道交貨時間，預先放一百元在鐵閘就可以收到貨。那麼母親可不可以大義滅親，報警求助？可以的，這位可憐母親吼到交貨之後，搶走女兒之K仔，直奔差館報警。警察話根據香港法例，母親「管有」K仔是母親涉嫌犯罪，沒有證據證明到K仔是女兒的。母親於是再在下一次暗中報警，但警察入門之時，女兒狂奔入廁所洗面潄口，毀滅證據，警察亦不能拉人。這樣那樣，母親也就終日以淚洗面，睇精神科醫生，大好家庭就咁被K仔毀滅。