秋天了，黃昏時份呆坐在沙發上睇住新聞台，一陣又一陣的涼風從窗紗中飄進來，舒服得一闔上眼就瞓得着，也多得那些新聞嘅悶人面容。係喎，我唔係想睇新聞，亦唔係想瞓晏覺噃，係睇接力隊嘛！係呀，新聞台直播香港隊比賽，算唔算係運動賽事upgrade咗呢？
天已黑、覺已瞓，全運會4x100米決賽正式上演，嘩勁呀，紅色衫嗰隊由頭帶到尾，香港隊真係進步神速！咦，睇真啲原來領先唔係港隊，港隊因為接棒失誤，包尾而回。哎呀，響未諗到點樣安慰邊做功課邊睇住電視嘅女兒時，我選擇熄機，索性連邊隊係冠軍都拒絕知道，反正唔係港隊。運動係咁怪嘅一件事，親疏真係有別。
應該唔係因為叮噹嘅關係，但係日本申奧成功好似同邨出咗個狀元咁，替人高興之餘，亦不忘提點自己屋企勤力啲啦，你睇人哋幾叻！同德能兄唔同，奧運幾大都好，我都只係最關心自己嗰一小部份，非常鄉下仔。還記得十幾年前響日本睇電視直播世界田徑賽，亦有類似經驗，話說男子400米決賽入面有位日本選手，成績麻麻排第7線，但係日本傳媒極之緊張，結果響比賽跑一圈途中，呢位選手不負所托表現神勇由頭帶到尾，咁勁？係喎，因為我響電視全程只係見到佢嘅大特寫，咁仲唔係攞冠軍？
原來真係唔係，只不過日本電視台全程用自己部攝影機跟住日本選手，由起跑到衝終點都望實佢，而佢最後只係跑第7，但我記得評述嘅朋友都好興奮！邊個攞第1？響慢鏡頭播時有得睇番，好似係米高莊遜，世界名將又點，不及自己友一個。
時日如飛，日本人嘅世界觀或者已經唔同咗，響申奧短片入面，佢哋就講咗一個運動嘅承傳故事，當年一個日本小朋友被一位白人叔叔鼓勵而努力打籃球，佢大個之後又提攜番南美小弟弟去加油，薪火相傳，we are the world！2020？此時此刻我最關心嘅只係，香港嘅運動員，仲有7年呀，加油！
KEYMAN
now TV主持
熱血青春電影《狂舞派》席捲今夏，柒良同阿花嘅夢想去盡未？
男女主角聯同導演黃修平齊上《亂噏24》，動Live預埋你！
http://bit.ly/appletalk24