眼前的歐陽震華（Bobby）中氣十足，精神飽滿，任誰都想不到今年農曆年初，他曾因急性肺炎昏迷被送院搶救，一度在鬼門關口徘徊，幸好最後蘇醒過來，總算大步檻過。死過翻生的Bobby，日前在銅鑼灣接受本報專訪時表示，體會到做人可以很偉大，同樣可以很渺小，他淡然地說：「有知覺嗰陣，做多啲有意義嘅事！我追求安樂，唔好話臨瞓前仲心掛掛聽日有乜嘢要做，有乜嘢要去解決，最好日日都安樂醒。」
撰文：何慧斯
出事之時，歐陽震華正值趕拍無綫劇集《情逆三世緣》，雖然已經事過境遷，但看到他今次的演出，難免會有點感慨，Bobby聞言後說：「人可以好偉大，又可以好渺小，真係要喺有知覺嗰陣，做多啲有意義嘅事，仲要乜嘢都要去玩多啲，今次我真係體會到。雖然醫生話呢啲意外喺公立醫院成日發生，喺佢哋立場反而覺得check到係末期嗰啲先叫難搞，但係我諗番起都驚，尤其係我老婆！」當日太太傅潔嫻一方面憂心Bobby的病情，另一方面又要應付傳媒的追訪，即使愁眉深鎖，她依然撐下去，這畫面至今仍感覺強烈，Bobby說：「佢（太太）處理得好好，當時嘅心情同環境，大家都想像唔到。」
死過翻生倍小心
大難不死，可有改變人生觀？Bobby哈哈大笑說：「又唔係好大變動，又係咁樣生活，只不過生活形式小心啲、檢點咗，食嘢唔好食咁飽，我嗰次就係食得太飽，連酒都未開始飲，積埋積埋透支咗都唔知，只係睇你幾時放鬆，搵到機會咪整你一下，嗰啖氣唞到咪冇事，吞唔番咪出事囉！呢個可能係警號，叫我唔好咁辛苦，唔好食咁飽。」
問到Bobby會否減少工作，抽多點時間陪太太？他說：「𠵱家做少咗好多，我成日都同佢食飯，我老婆知我唔會勉強去做，最好半年休息、半年工作！」
提到太太傅潔嫻，雖然她是澳門前任賭王傅老榕的孫女，Bobby只是一個電視小生，二人背景懸殊，難免令不少人戴上有色眼鏡看Bobby，但他們一於懶理，Bobby更說：「好多人以為我食軟飯，不過如果係，我就唔使咁嘅樣，我老婆話我係佢嘅搖錢樹。佢好肯同我捱，從來係量入為出，唔係好似大小姐咁睇啱就買，反而會周圍格價。」
太太EQ超乎常人
Bobby又自爆購物時比太太衝動，他說：「我自己買嘢比佢衝動得多，好多時一見到就買，佢反而會行多兩間，降一降溫先。試過有一次我睇中咗架車，仲諗住一口氣買一架畀佢，一架畀我，點知佢叫我唔好咁衝動，而且亦覺得冇必要，佢EQ好高，超乎常人，我就唔合格！」記者笑問是否因為欣賞才娶她？Bobby笑說：「咁都唔欣賞？講真，我同佢拍咗拖半年先知道佢嘅背景，直至有周刊起咗佢個底先知，不過嗰陣已經好穩定，仲唔覺唔覺結咗婚17年。」
婚姻生活美滿，事業上Bobby亦屢創高𥧌，從1982年報讀藝訓班開始拍劇至今，人生經歷過無數的考驗，天生樂觀的Bobby，被問到人生追求的事，他淡然地說：「我追求安樂，唔好話臨瞓前仲心掛掛聽日有乜嘢要做，有乜嘢要去解決，最好日日都安樂醒。拍戲唔好話好老套，我真係想有啲好啲嘅劇本，呢個追求係好難㗎，地球係得咁大，資源始終會發掘完，好多橋都用到盡，唔係抄都會撞，做演員好被動，我嗰個年代怕越權，所以唔敢講太多意見，但係𠵱家時代唔同，有機會都想參與，可以傾吓開啲乜嘢劇。」
場地提供：SML of Times Square
熱血青春電影《狂舞派》席捲今夏，柒良同阿花嘅夢想去盡未？男女主角聯同導演黃修平齊上《亂噏24》，動
Live預埋你！ http://bit.ly/appletalk24